મોરબી તા. ૯ :.. મોરબી તાલુકાના ટીંબડી ગામમાં આવેલી બાલાજી પાર્ક સહિતની વિવિધ સોસાયટીઓમાં ગેસ પાઇપલાઇનની કામગીરી અધૂરી છોડાતા રહેવાસીઓમાં ભારે રોષ ફેલાયો છે. ગેસ કંપની હાલમાં દ્વારા જાન્‍યુઆરી મહિનામાં પાઇપલાઇન નાખવાની કામગીરી શરૂ કરવામાં આવી હતી.તે સમયે રહેવાસીઓને વિશ્વાસમાં લઈને ગેસ કનેક્‍શન માટે એડવાન્‍સ પેમેન્‍ટ પણ વસૂલવામાં આવ્‍યું હતું. જોકે, બે મહિનામાં માં કામગીરી પૂર્ણ કરીશું! બાદ કંપનીએ કામ અધવચ્‍ચે જ બંધ કરી દીધું હોવાનું સ્‍થાનિકોનું કહેવું છે.

રહેવાસીઓના જણાવ્‍યા મુજબ, અનેક વખત રજૂઆતો કરવામાં આવી હતી. દરેક વખતે કંપની દ્વારા ફેબ્રુઆરીમાં, ત્‍યારબાદ માર્ચમાં, પછી એપ્રિલ, મે માં અને ત્‍યારબાદ જૂનમાં કામગીરી પૂર્ણ કરી ગેસ લાઇન શરૂ કરી દેવાની ખાતરી આપવામાં આવી હતી.પરંતુ હવે જુલાઈ મહિનો શરૂ થઈ ગયો હોવા છતાં આજદિન સુધી ગેસ પાઇપલાઇનનું કામ પૂર્ણ થયું નથી અને કનેક્‍શન પણ આપવામાં આવ્‍યા નથી.! આ ઉપરાંત, ગેસ લાઇન માટે અનેક સ્‍થળોએ રસ્‍તાઓ અને સોસાયટી વિસ્‍તારમાં ખાડાઓ ખોદીને તેમ જ છોડી દેવામાં આવ્‍યા છે. ચોમાસાની ઋતુ શરૂ થતાં આ ખાડાઓમાં પાણી ભરાઈ રહ્યું છે, જેના કારણે સ્‍થાનિક રહેવાસીઓ તેમજ વાહનચાલકોને ભારે હાલાકીનો સામનો કરવો પડી રહ્યો છે.

સ્‍થાનિક રહેવાસીઓએ ગેસ કંપની સામે આક્રોશ વ્‍યક્‍ત કરતાં જણાવ્‍યું છે કે જો વહેલી તકે ગેસ પાઇપલાઇનનું કામ પૂર્ણ કરી કનેક્‍શન આપવામાં નહીં આવે તેમજ ખોદેલા ખાડાઓ યોગ્‍ય રીતે પુરવામાં નહીં આવે તો તેઓ ગાંધી ચિંધ્‍યા માર્ગે આંદોલન કરવા મજબૂર બનશે.