મોટી કુંકાવાવ : અમરેલી જિલ્લાના વડીયા તાલુકાના મોટી કુંકાવાવ ગામમાં નવા વર્ષના પવિત્ર દિવસે પૈસાની લેતીદેતીના જૂના વિવાદને લઈને બે જૂથ વચ્ચે હિંસક અથડામણ સર્જાઈ હોવાની ગંભીર ઘટના સામે આવી છે.

પ્રાપ્ત વિગતો અનુસાર, ગામમાં રહેતા ભરતભાઈ ધાંધલ નામના ઈસમને પોતાની જ્ઞાતિના અન્ય કેટલાક શખ્સો સાથે લાંબા સમયથી પૈસાની લેતીદેતીને લઈને અદાવત ચાલી રહી હતી, જેનો ખાર રાખીને નવા વર્ષના દિવસે આ હુમલો કરવામાં આવ્યો હતો.

નવા વર્ષના દિવસે બપોરના સુમારે આરોપીઓએ એકસંપ થઈને ફરિયાદી ભરતભાઈ પોતાના ઘર નજીક સ્વીફ્ટ કારમાં બેઠા હતા ત્યારે લોખંડની પાઈપ, પ્લાસ્ટિકની પાઈપ અને પથ્થરો સાથે અચાનક હુમલો કરી દીધો હતો અને કારના કાચ તોડી નાખ્યા હતા.

હુમલાખોરોથી બચવા માટે ભરતભાઈ દોડીને પોતાના ઘરમાં છુપાયા હતા, પરંતુ ઉત્તેજિત ટોળાએ ઘર પર પણ પથ્થરમારો કર્યો હતો અને તેમને જાનથી મારી નાખવાની ધમકી આપી હતી, જેમાં ભરતભાઈને ડાબા હાથની આંગળી પર ગંભીર ઈજા પહોંચી હતી.

આ હુમલામાં ઘાયલ થયેલા ભરતભાઈને તાત્કાલિક સારવાર અર્થે કુંકાવાવ સરકારી હોસ્પિટલ ખાતે ખસેડવામાં આવ્યા હતા, જ્યાં પણ આરોપીઓ દ્વારા હોસ્પિટલ પરિસરમાં તેમના પરિવાર પર હુમલો કરવાનો પ્રયાસ કરવામાં આવ્યો હોવાનું જાણવા મળ્યું છે.

આ મામલે ભોગ બનનાર ભરતભાઈ ધાંધલની સત્તાવાર ફરિયાદના આધારે વડીયા પોલીસ સ્ટેશન ખાતે ૧૬ જેટલા નામજોગ આરોપીઓ સામે ગુનો દાખલ કરવામાં આવ્યો છે, અને પોલીસે આ સમગ્ર પ્રકરણમાં આગળની સઘન તપાસ શરૂ કરી છે.