જૂનાગઢ, તા. 15 : જૂનાગઢ મહાનગરપાલિકાની સામાન્ય સભામાં આજે ભારે તંગદિલી અને હાઈવોલ્ટેજ ડ્રામા સર્જાયો હતો. સભાની શરૂઆતમાં જ સભાખંડમાં હાજર પત્રકારોને વેલમાં બેસીને કાર્યવાહીનું કવરેજ કરવાનો આદેશ આપવામાં આવતા વિવાદ ફાટી નીકળ્યો હતો.

કોંગ્રેસે આરોપ લગાવ્યો કે શાસક ભાજપ વિપક્ષની રજૂઆત અને જનતાના પ્રશ્નો લોકો સુધી ન પહોંચે તે માટે મીડિયા પર અંકુશ મૂકી રહ્યું છે. આ મુદ્દે ભાજપના નગરસેવક શૈલેષ દવે અને કોંગ્રેસના નગરસેવક અદ્રેમાન પંજા વચ્ચે જોરદાર તૂ-તૂ મૈં-મૈં થઈ હતી. બંને પક્ષો ઊંચા અવાજે બોલવા લાગતા હોલમાં અફરાતફરી મચી ગઈ હતી અને લોકપ્રશ્નોની ચર્ચા બાજુ પર રહી ગઈ હતી.

શાસક પક્ષના વલણ સામે કોંગ્રેસના તમામ નગરસેવકો એકત્ર થઈ સભાખંડમાં નીચે બેસી જઈ ધરણાં પર ઉતરી આવ્યા હતા અને સૂત્રોચ્ચાર કરી વિરોધ નોંધાવ્યો હતો.

ભારે બોલાચાલી અને સૂત્રોચ્ચાર વચ્ચે ભાજપના કેટલાક વરિષ્ઠ નગરસેવકોએ દરમિયાનગીરી કરી બંને પક્ષોને શાંત પાડ્યા બાદ મામલો થાળે પડ્યો હતો અને ત્યારબાદ સામાન્ય સભાની કાર્યવાહી નિયમ મુજબ આગળ ધપાવવામાં આવી હતી.