​ભુજ : કચ્છના સુપ્રસિદ્ધ બન્ની પ્રદેશની વિશિષ્ટ પશુ નસલોએ ફરી એકવાર દેશભરમાં પોતાની આગવી ઓળખ અને મૂલ્ય સાબિત કરી બતાવ્યું છે. નખત્રાણા તાલુકાના અંતરિયાળ લૈયારી ગામમાં પશુપાલન વ્યવસાય સાથે જોડાયેલા એક માલધારી દ્વારા કરવામાં આવેલા સોદાએ સમગ્ર પંથકમાં આશ્ચર્ય અને ઉત્સાહનું મોજું ફેલાવી દીધું છે. અહીંના સ્થાનિક પશુપાલક અભદ્રીમ જતની માલિકીની શુદ્ધ બન્ની (કુંજ) નસલની એક ભેંસ વિક્રમી નવ લાખ રૂપિયાની માતબર કિંમતે વેચાતા પશુપાલન ક્ષેત્રે એક ઐતિહાસિક ઘટના આકાર પામી છે.

​શુદ્ધ નસલ અને અદભુત શારીરિક ક્ષમતાનું આકર્ષણ

લૈયારી ગામના પશુપાલક અભદ્રીમભાઈ જત દ્વારા છેલ્લા ઘણા સમયથી અત્યંત પ્રેમ અને કુદરતી વાતાવરણમાં ઉછેરવામાં આવેલી આ ભેંસ ‘ગુડ્ડી’ તરીકે ઓળખાય છે. બન્ની ભેંસો તેમની કપરી પરિસ્થિતિમાં પણ ટકી રહેવાની ક્ષમતા અને પોષક તત્વોથી ભરપૂર દૂધ આપવા માટે જાણીતી છે. 'ગુડ્ડી' નામના આ પશુના મજબૂત શારીરિક બાંધા, શિંગડાની અસલ અને લાક્ષણિક ગોળાઈ તેમજ શુદ્ધ બન્ની નસલના તમામ માપદંડોને તે પરિપૂર્ણ કરતી હોવાથી તે આખા વિસ્તારમાં પશુ પ્રેમીઓ માટે આકર્ષણનું કેન્દ્ર બની હતી.

​અમદાવાદના પશુપાલકે સાધ્યો મોટો સોદો

આ કિંમતી પશુની અસલ પારખ કરીને અમદાવાદ જિલ્લાના ચંદ્રાલા કઠવાલા ગામના જાણીતા પશુપાલક લાલભાઈ ગોવાભાઈ દેસાઈએ તેને ખરીદવાનો નિર્ણય લીધો હતો. પશુઓની ઉત્તમ જાત પારખવામાં નિપુણ એવા લાલભાઈએ કોઈ પણ ખચકાટ વિના રૂ. 9 લાખ જેવી ઊંચી રકમ ચૂકવીને આ ભેંસને પોતાના તબેલામાં સામેલ કરી છે. મળતી માહિતી મુજબ, આ ભેંસ આગામી બે મહિનામાં વિયાણી થવાની છે, જેના કારણે તેનું મૂલ્ય વધુ આંકવામાં આવ્યું હતું.

​માલધારી સમાજમાં ગૌરવની લાગણી

આ રેકોર્ડબ્રેક વેચાણને પગલે સોશિયલ મીડિયા પર અને માલધારી સંગઠનોમાં અભિનંદનનો ધોધ વરસી રહ્યો છે. પશુપાલન વ્યવસાય સાથે સંકળાયેલા લોકો માને છે કે, આ પ્રકારના મોટા સોદાઓ સ્થાનિક પશુપાલકોને શુદ્ધ નસલના જતન માટે વધુ પ્રોત્સાહિત કરશે. બન્ની નસલના પશુઓની માંગમાં ઉત્તરોત્તર થઈ રહેલો વધારો કચ્છના પરંપરાગત પશુપાલન વ્યવસાયને આધુનિક યુગમાં પણ ગૌરવપ્રદ સ્થાને પહોંચાડી રહ્યો છે.