જૂનાગઢ: ગિરનારની લીલી પરિક્રમા અને યાત્રાધામના રૂટ પર સિંહના હુમલાની ચોંકાવનારી ઘટના બાદ ભયના ઓથાર વચ્ચે પ્રશાસન દ્વારા એક મોટો અને મહત્વનો નિર્ણય લેવામાં આવ્યો છે. ગિરનારની સીડીઓ પર શ્રદ્ધાળુ પર સિંહે કરેલા હુમલા બાદ સુરક્ષાના કારણોસર યાત્રા રોકી દેવામાં આવી હતી, પરંતુ ગણતરીના ૨૪ કલાકોમાં જ વન વિભાગ અને સ્થાનિક તંત્ર દ્વારા પરિસ્થિતિની સમીક્ષા કરીને શ્રદ્ધાળુઓ માટે ગિરનારના દ્વાર ફરીથી ખોલી દેવામાં આવ્યા છે. આ નિર્ણયથી ભક્તોમાં ખુશીની લહેર દોડી ગઈ છે અને ગિરનારની કંદરાઓમાં ફરી એકવાર ‘જય ગિરનારી’નો નાદ ગૂંજવા લાગ્યો છે.

પગથિયાં પર સિંહ ત્રાટકતા મચી હતી નાસભાગ: વન વિભાગે તાત્કાલિક લીધા હતા પગલાં

શનિવારે ગિરનારના પગથિયાં ચડી રહેલા યાત્રાળુઓ પર સિંહે અચાનક હુમલાનો પ્રયાસ કર્યો હોવાની ઘટના સામે આવી હતી. જંગલ બોર્ડર નજીકના આ વિસ્તારમાં વનરાજે દેખા દેતા જ યાત્રાળુઓમાં ભારે ગભરાટ ફેલાઈ ગયો હતો અને સુરક્ષાને ધ્યાનમાં રાખીને વન વિભાગે તાત્કાલિક અસરથી ગિરનાર આરોહણ-અવરોહણ પર અસ્થાયી પ્રતિબંધ મૂકી દીધો હતો. ઘટના બાદ વન વિભાગના ઉચ્ચ અધિકારીઓ સહિતનો કાફલો ઘટનાસ્થળે દોડી ગયો હતો અને સિંહની લોકેશન ટ્રેક કરવાની કામગીરી યુદ્ધના ધોરણે શરૂ કરવામાં આવી હતી.

સિંહનો રૂટ બદલાયો: વન વિભાગના સઘન ટ્રેકિંગ બાદ ભય ટળ્યો

વન વિભાગની જુદી-જુદી ટીમો દ્વારા આખી રાત ગિરનારના જંગલ વિસ્તાર અને પગથિયાંની આસપાસ સર્ચ ઓપરેશન ચલાવવામાં આવ્યું હતું. વન વિભાગના ટ્રેકર્સના જણાવ્યા અનુસાર, હુમલો કરનાર સિંહ હવે માનવ વસાહત અને પગથિયાંના રૂટ પરથી ખસીને ગણદેવી અને લાખાણીયા ખોડીયાર વિસ્તાર તરફ ઊંડા જંગલમાં ચાલ્યો ગયો છે. શ્રદ્ધાળુઓના રૂટ પર હવે સિંહની કોઈ મૂવમેન્ટ ન જણાતા અને જોખમ ટળી ગયું હોવાની ખાતરી થતાં જ માત્ર ૨૪ કલાકોમાં જ યાત્રા ફરી શરૂ કરવાની મંજૂરી આપવામાં આવી છે.

નવી ગાઈડલાઈન સાથે સુરક્ષા ચુસ્ત: રાત્રિ પેટ્રોલિંગ અને વોચ ટાવર સક્રિય

યાત્રા ફરી શરૂ કરવાની સાથે જ વન વિભાગે શ્રદ્ધાળુઓની સુરક્ષા માટે લોખંડી બંદોબસ્ત ગોઠવી દીધો છે. હવેથી ગિરનારના પગથિયાં પર વન કર્મચારીઓનું રાઉન્ડ ધ ક્લોક પેટ્રોલિંગ રહેશે અને સંવેદનશીલ પોઈન્ટ્સ પર ખાસ વોચ ટાવરથી નજર રાખવામાં આવશે. આ સાથે જ વન વિભાગ દ્વારા યાત્રાળુઓ માટે ખાસ સૂચનાઓ જાહેર કરવામાં આવી છે, જેમાં વહેલી સવારે અથવા મોડી રાત્રે એકલ-દોકલ જવાના બદલે ગ્રૂપમાં યાત્રા કરવા અને જંગલના પ્રતિબંધિત વિસ્તારોમાં ન ઉતરવા માટે અપીલ કરવામાં આવી છે જેથી ભવિષ્યમાં આવી કોઈ અનિચ્છનીય ઘટના ન બને.