ભાવનગર, તા.૬ : ભાવનગર શહેરના સરદારનગર વિસ્તારમાં છેડતીની આશંકાને લઈને મોડી રાત્રે ભારે હોબાળો મચ્યો હતો. સ્થાનિક લોકોના ટોળાએ એકઠા થઈને હંગામો મચાવ્યો હતો અને કેટલાક વાહનોમાં તોડફોડ કરી હતી.

મળતી માહિતી મુજબ, વિસ્તારમાં છેડતીની ઘટના બની હોવાની આશંકાએ લોકોમાં રોષ ફેલાયો હતો. જોતજોતામાં મોટી સંખ્યામાં લોકો રસ્તા પર એકઠા થઈ ગયા હતા અને સૂત્રોચ્ચાર સાથે વિરોધ કર્યો હતો. ઉશ્કેરાયેલા ટોળાએ આસપાસ પાર્ક કરેલા વાહનોમાં તોડફોડ કરતા વાતાવરણ તંગ બન્યું હતું.

ઘટનાની જાણ થતાં જ ભાવનગર પોલીસનો કાફલો તાત્કાલિક સ્થળ પર દોડી આવ્યો હતો. પોલીસે ટોળાને શાંત પાડી પરિસ્થિતિને કાબૂમાં લીધી હતી. હાલ પોલીસે સમગ્ર મામલે તપાસ હાથ ધરી છે અને છેડતીની આશંકા અંગે હકીકત જાણવા પ્રયાસો શરૂ કર્યા છે. તોડફોડ કરનારા તત્વોની પણ ઓળખ કરવામાં આવી રહી છે.

આ ઘટનાને પગલે વિસ્તારમાં રાત્રે તંગદિલીનો માહોલ સર્જાયો હતો. પોલીસે લોકોને અફવાથી દૂર રહેવા અને કાયદો હાથમાં ન લેવા અપીલ કરી છે.