મહુવા : ભાવનગર જિલ્લાના મહુવા તાલુકામાં આવેલા માલણ ડેમમાં ઉપરવાસમાંથી આવી રહેલા પાણીના સતત પ્રવાહના કારણે આ સિઝનમાં ચોથી વખત ડેમ ઓવરફ્લો થઈ ગયો છે, જેના પગલે વહીવટી તંત્ર દ્વારા નીચાણવાળા વિસ્તારોમાં રહેતા ૧૦ જેટલા ગામોને હાઈ એલર્ટ પર રાખવામાં આવ્યા છે.

માલણ ડેમમાંથી પાણીનો પ્રવાહ અચાનક વધવાની શક્યતાને ધ્યાનમાં રાખીને તંત્ર દ્વારા મોટા ખુટવડા, ગોરસ, સાંગણીયા, લખુપરા, કુંભણ, નાના જાદરા, તાવેડા, ઉમણીયાવદર, મહુવા અને કતપર ગામના લોકોને ખાસ સાવચેત રહેવા અને સુરક્ષિત સ્થાનો પર રહેવાની સખત સૂચના આપવામાં આવી છે.

આ ડેમની વિશેષતા એ છે કે તેમાં ઓટોમેટિક દરવાજાની વ્યવસ્થા કાર્યરત હોવાથી દરવાજો ક્યારે ખૂલી જશે તે ચોક્કસપણે અગાઉથી નક્કી કરી શકાતું નથી, જેના કારણે પાણીનો પ્રવાહ ગમે ત્યારે અચાનક વધી શકે છે અને નીચાણવાળા ક્ષેત્રોમાં જોખમ ઊભું થઈ શકે છે.

અનિચ્છનીય બનાવ ટાળવા માટે સ્થાનિક વહીવટી તંત્ર દ્વારા લોકોને નદી, નાળા તેમજ ડેમના વહેણ નજીક બિલકુલ ન જવા અપીલ કરાઈ છે, જ્યારે તંત્ર દ્વારા સમગ્ર પરિસ્થિતિ પર સતત મોનિટરિંગ રાખીને સ્થિતિ પર બાજ નજર રાખવામાં આવી રહી છે.