<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Sunday, 22nd November 2026

આંતર યુનિવર્સિટી જુડો સ્પર્ધામાં નંદકુવરબા મહિલા કોલેજની વિદ્યાર્થીની મેણીયા વનિતા જીતુભાઈએ ગોલ્ડ મેડલ મેળવી રચ્યો ઇતિહાસ

એમ.કે.બી. યુનિવર્સિટીના રમતગમતના ઇતિહાસમાં પ્રથમ વખત જુડોમાં ગોલ્ડ મેડલ પ્રાપ્ત કરી ભાવનગરનું નામ રોશન કર્યું – નેહા બુધેલીયાની પણ નેશનલ કક્ષાએ પસંદગી

(વિપુલ હિરાણી દ્વારા ) ભાવનગર : મહારાજા કૃષ્ણકુમારસિંહજી ભાવનગર યુનિવર્સિટી સંલગ્ન નંદકુવરબા મહિલા કોલેજ, દેવરાજ નગર ખાતે અભ્યાસ કરતી વિદ્યાર્થીનીઓએ રમતગમત ક્ષેત્રે ભવ્ય સફળતા પ્રાપ્ત કરીને સમગ્ર ભાવનગર યુનિવર્સિટી અને ગુજરાતનું ગૌરવ વધાર્યું છે. આંતર યુનિવર્સિટી જુડો સ્પર્ધામાં નંદકુવરબા મહિલા કોલેજની વિદ્યાર્થીની કુમારી મેણીયા વનિતા જીતુભાઈએ શાનદાર પ્રદર્શન કરીને ગોલ્ડ મેડલ પ્રાપ્ત કર્યો છે. આ સાથે જ મહારાજા કૃષ્ણકુમારસિંહજી ભાવનગર યુનિવર્સિટીના ઇતિહાસમાં જુડો સ્પર્ધામાં પ્રથમ વખત ગોલ્ડ મેડલ પ્રાપ્ત કરવાની ઐતિહાસિક સિદ્ધિ નોંધાઈ છે.
  આ સ્પર્ધામાં ભાગ લેવા માટે કુમારી મેણીયા વનિતા જીતુભાઈએ અગાઉ મહારાજા કૃષ્ણકુમારસિંહજી ભાવનગર યુનિવર્સિટી દ્વારા આયોજિત યુનિવર્સિટી કક્ષાની જુડો સ્પર્ધામાં 70 કિલોગ્રામ વજન વર્ગમાં ભાગ લીધો હતો. જેમાં તેમણે ઉત્કૃષ્ટ રમત કૌશલ્યનું પ્રદર્શન કરીને પ્રથમ ક્રમાંક પ્રાપ્ત કર્યો હતો અને આંતર યુનિવર્સિટી સ્પર્ધા માટે પોતાની પસંદગી સુનિશ્ચિત કરી હતી.
   ત્યારબાદ ગુજરાતની સ્વર્ણિમ ગુજરાત સ્પોર્ટ્સ યુનિવર્સિટી ખાતે આયોજિત આંતર યુનિવર્સિટી જુડો સ્પર્ધામાં એમ.કે.બી. યુનિવર્સિટીનું પ્રતિનિધિત્વ કરતાં કુમારી મેણીયા વનિતા જીતુભાઈએ 70 કિલોગ્રામ વજન વર્ગમાં ભાગ લીધો હતો. આ સ્પર્ધામાં ગુજરાત, મહારાષ્ટ્ર અને રાજસ્થાનની વિવિધ યુનિવર્સિટીઓના પ્રતિભાશાળી ખેલાડીઓએ પોતાની યુનિવર્સિટીનું પ્રતિનિધિત્વ કર્યું હતું. આવી કઠિન અને પ્રતિષ્ઠિત સ્પર્ધામાં વનિતાએ પોતાના આત્મવિશ્વાસ, સખત મહેનત, શિસ્તબદ્ધ રમત અને શ્રેષ્ઠ ટેકનિકના બળે તમામ પ્રતિસ્પર્ધીઓને પરાજિત કરીને પ્રથમ સ્થાન પ્રાપ્ત કર્યું હતું અને ગોલ્ડ મેડલ પોતાના નામે કર્યો હતો.
  આ સિદ્ધિ માત્ર એક વિદ્યાર્થીનીની વ્યક્તિગત સફળતા નથી, પરંતુ સમગ્ર મહારાજા કૃષ્ણકુમારસિંહજી ભાવનગર યુનિવર્સિટી માટે ઐતિહાસિક ગૌરવની ક્ષણ બની છે. યુનિવર્સિટીના ઇતિહાસમાં પ્રથમ વખત જુડો સ્પર્ધામાં ગોલ્ડ મેડલ પ્રાપ્ત થતાં નંદકુવરબા મહિલા કોલેજે રમતગમત ક્ષેત્રે પોતાની આગવી ઓળખ પ્રસ્થાપિત કરી છે.
  આ ઉપરાંત નંદકુવરબા મહિલા કોલેજની અન્ય પ્રતિભાશાળી વિદ્યાર્થીની કુમારી નેહા બુધેલીયાએ પણ જુડો સ્પર્ધાના માઇનસ 63 કિલોગ્રામ વજન વર્ગમાં ઉત્કૃષ્ટ પ્રદર્શન કરીને નેશનલ કક્ષાની સ્પર્ધા માટે ક્વોલિફાઈ થવાની સિદ્ધિ પ્રાપ્ત કરી છે. આમ એક જ કોલેજની બે વિદ્યાર્થીનીઓએ આંતર યુનિવર્સિટી કક્ષાએ પોતાની પ્રતિભાનો પરિચય આપીને રાષ્ટ્રીય સ્તરે આગળ વધવાનો માર્ગ મોકળો કર્યો છે.
  નંદકુવરબા મહિલા કોલેજ દેવરાજ નગર દ્વારા અભ્યાસની સાથે રમતગમત, સાંસ્કૃતિક, સામાજિક અને અન્ય સહઅભ્યાસિક પ્રવૃત્તિઓમાં પણ વિદ્યાર્થીનીઓને પ્રોત્સાહન આપવામાં આવે છે. વિદ્યાર્થીનીઓને યોગ્ય માર્ગદર્શન, તાલીમ અને પ્રોત્સાહન મળે તે માટે કોલેજ દ્વારા સતત પ્રયત્નો કરવામાં આવે છે. જેના પરિણામે આજે કોલેજની વિદ્યાર્થીનીઓ યુનિવર્સિટી, રાજ્ય અને રાષ્ટ્રીય કક્ષાએ પોતાની પ્રતિભા સાબિત કરી રહી છે.
   ખાસ કરીને જુડો જેવી સ્પર્ધાત્મક રમતમાં વિદ્યાર્થીનીઓએ પ્રાપ્ત કરેલી આ સિદ્ધિ અન્ય વિદ્યાર્થીનીઓ માટે પણ પ્રેરણારૂપ બની રહેશે. મેણીયા વનિતાએ ગોલ્ડ મેડલ પ્રાપ્ત કરીને યુનિવર્સિટીના ઇતિહાસમાં નવો અધ્યાય ઉમેર્યો છે, જ્યારે નેહા બુધેલીયાની નેશનલ કક્ષાએ પસંદગી કોલેજ માટે વધુ એક ગૌરવપૂર્ણ સિદ્ધિ બની છે.
   આ બંને વિદ્યાર્થીનીઓની આ ઐતિહાસિક સફળતા બદલ નંદકુવરબા મહિલા કોલેજના મેનેજિંગ ટ્રસ્ટી ભરતસિંહ ગોહિલ તથા મેનેજિંગ ડાયરેક્ટર ડૉ. રવિન્દ્રસિંહ સરવૈયાએ બંને ખેલાડીઓને હાર્દિક અભિનંદન પાઠવ્યાં હતાં અને આગામી રાષ્ટ્રીય કક્ષાની સ્પર્ધામાં પણ શ્રેષ્ઠ પ્રદર્શન કરીને કોલેજ, યુનિવર્સિટી અને ભાવનગરનું નામ રોશન કરે તેવી શુભેચ્છાઓ પાઠવી હતી.
આમ, નંદકુવરબા મહિલા કોલેજ દેવરાજ નગરની બે વિદ્યાર્થીનીઓએ જુડો ક્ષેત્રે પ્રાપ્ત કરેલી આ ભવ્ય સફળતાથી સમગ્ર ભાવનગરમાં આનંદ અને ગૌરવની લાગણી પ્રસરી છે

(6:28 PM IST)