રાજકોટ જિલ્લાના ઉપલેટા તાલુકાના ખાખી જાળીયા ગામમાં એક પશુપાલકના વાડામાં અચાનક ભીષણ આગ ભભૂકી ઉઠતા સમગ્ર વિસ્તારમાં ભારે અફરાતફરી અને દોડધામ મચી ગઈ હતી. આ દુર્ઘટનામાં વાડામાં રાખેલો મગફળીનો અંદાજે રૂ. 50,000 ની કિંમતનો કિંમતી ચારો બળીને સંપૂર્ણપણે ખાખ થઈ ગયો છે. ઘટનાની જાણ થતાં જ ભાયાવદર ફાયર ફાઈટરની ટીમ તાત્કાલિક ઘટનાસ્થળે દોડી આવી હતી અને ભારે જહેમત બાદ આગ પર કાબૂ મેળવ્યો હતો. સદનસીબે આ આગની ઘટનામાં કોઈ જાનહાનિ થઈ નથી, જેને પગલે તંત્ર અને સ્થાનિકોએ રાહતનો શ્વાસ લીધો છે.

  ખાખી જાળીયા ગામે રહેતા સ્થાનિક પશુપાલક નારણભાઈ મેણસીભાઈ વામરોટીયાના વાડામાં આ અકસ્માત સર્જાયો હતો. નારણભાઈએ પોતાના પશુઓ માટે થોડા સમય પહેલાં જ અંદાજે રૂ.50,000ની માતબર રકમ ખર્ચીને મગફળીનો ચારો (ખોળ-નીરણ) ખરીદ્યો હતો. વાડામાં અચાનક કોઈ કારણોસર આગ લાગતા આ મગફળીનો તમામ ચારો જોતજોતામાં બળીને ખાખ થઈ ગયો હતો. પશુઓના ખાણ માટે સંગ્રહ કરાયેલો ચારો નાશ પામતા પશુપાલક પરિવાર મુશ્કેલીમાં મુકાયો છે.