અમરેલી જિલ્લાના લાઠી તાલુકાના ગ્રામ્ય વિસ્તારોમાં બપોર બાદ અચાનક વાતાવરણમાં પલટો આવ્યો હતો અને ચાવંડ, વીરપુર તેમજ કરકોલિયા સહિતના ગામોમાં વીજળીના કડાકા-ભડાકા સાથે ધોધમાર મુશળધાર વરસાદ તૂટી પડ્યો હતો. છેલ્લા કેટલાક દિવસોથી અસહ્ય ગરમી અને અકળાવનારા બફારાથી તોબા પોકારી ગયેલા સ્થાનિક લોકોને આ ધમાકેદાર વરસાદના પગલે મોટી રાહત મળી છે અને સમગ્ર પંથકમાં પળવારમાં ઠંડક પ્રસરી ગઈ છે. આ ચોમાસાના આગમન સમાન વરસાદને કારણે નગરજનોમાં ઉત્સાહનો માહોલ છે, બીજી તરફ ખેતીકામ માટે અનુકૂળ વાતાવરણ સર્જાતા ધરતીપુત્રોમાં પણ ભારે ખુશી જોવા મળી રહી છે.