પરકવિન વ્યાસ દ્વારા, મોરબી: મોરબીના જેતપર ગામ ખાતે અદાણી કંપનીની હાઇટેન્શન વીજ લાઇનના વિરોધમાં સ્થાનિક ખેડૂતો દ્વારા છેલ્લા ઘણા દિવસોથી ઉગ્ર આંદોલન ચલાવવામાં આવી રહ્યું છે. આ આંદોલનને હવે મોરબીના વિશ્વપ્રસિદ્ધ સિરામિક ઉદ્યોગ તરફથી પણ મજબૂત અને ખુલ્લું સમર્થન સાંપડ્યું છે. ખેડૂતોના આ ન્યાયી આંદોલનને વેગ આપવા અને પોતાનો ટેકો જાહેર કરવા માટે મોરબી સિરામિક ટ્રેડિંગ એસોસિએશન દ્વારા આજે એક વિશાળ કાર રેલીનું આયોજન કરવામાં આવ્યું હતું. આ રેલી જેતપર રોડ પરથી પસાર થઈ ત્યારે બ્લુ ઝોન સિરામિક ફેક્ટરી દ્વારા રસ્તામાં રેલીમાં જોડાયેલા તમામ લોકો માટે ચા-પાણી તેમજ ઠંડા પીણાની સુંદર વ્યવસ્થા ગોઠવીને ઉષ્માભર્યું સ્વાગત કરવામાં આવ્યું હતું.

પોતે ખેડૂત અને સિરામિક પરિવારના ભાગ હોવાથી આયોજનમાં સહભાગી બન્યા:

સિરામિક મેન્યુફેક્ચરિંગ એસોસિએશનના પ્રમુખ અને બ્લુ ઝોન સિરામિકના માલિક મનોજભાઈ એરવાડિયાએ મીડિયા સમક્ષ વિગતો આપતા જણાવ્યું હતું કે, જેતપર ગામે અદાણી કંપનીની વીજ લાઇન સામે ચાલી રહેલા ખેડૂતોના આંદોલનને મોરબી સિરામિક ટ્રેડિંગ એસોસિએશનનો પૂરેપૂરો સહયોગ અને સપોર્ટ મળેલો છે. આ સહયોગના ભાગરૂપે જ આજે આ ભવ્ય કાર રેલીનું આયોજન કરવામાં આવ્યું છે. આ કાર રેલી જ્યારે તેમની ફેક્ટરી પાસેથી પસાર થઈ રહી હતી, ત્યારે દેશના અન્નદાતાના સમર્થનમાં નીકળેલા ભાઈઓ માટે રસ્તામાં ચા-પાણી અને ઠંડા પીણાની વ્યવસ્થા સેવાભાવથી કરવામાં આવી છે. તેઓ પોતે પણ એક ખેડૂત પુત્ર છે અને સાથે સિરામિક પરિવારના સભ્ય પણ છે, જેથી આ બંને નાતે તેઓ આ આયોજનમાં હોંશેહોંશે સહભાગી બન્યા છે.

સરકારમાં યોગ્ય રજૂઆત કરી ખેડૂતોને ન્યાય અપાવવા કટિબદ્ધતા જાહેર કરી:

મનોજભાઈ એરવાડિયાએ ખેડૂતોની લડતને વધુ મજબૂત બનાવવાની જાહેરાત કરતા ઉમેર્યું હતું કે, ખેડૂતો સાથે થઈ રહેલો અન્યાય સહન કરવામાં નહીં આવે. આગામી સમયમાં જો જરૂર પડશે તો માત્ર ટ્રેડર્સ જ નહીં, પરંતુ સમગ્ર સિરામિક એસોસિએશન પણ ખુલ્લીને સડક પર ખેડૂતોના સમર્થનમાં આગળ આવશે. આ મામલે સરકારના ઉચ્ચ સ્તરે પણ યોગ્ય અને સચોટ રજૂઆતો કરવામાં આવશે, જેથી કરીને આંદોલન કરી રહેલા ખેડૂતોને વહેલી તકે યોગ્ય ન્યાય મળે. ખેડૂતોના હિત માટે કરવામાં આવનારા તમામ પ્રયાસોમાં સિરામિક એસોસિએશન તરફથી કોઈ પણ પ્રકારની કચાસ રાખવામાં આવશે નહીં તેવી મક્કમ ખાતરી પણ તેમણે અંતમાં આપી હતી.