(સંજય ડાંગર દ્વારા) ધ્રોલ તા.૧૩ : મોરબી જિલ્લાના માળિયા-પીપળિયા વચ્ચેના ૨૪.૫૧ કિલોમીટર લાંબા નેશનલ હાઈવે-151Aને છ-માર્ગીય બનાવવાની મંજૂરી આપવામાં આવી છે. કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરીએ સોશિયલ મીડિયા પર આ પ્રોજેક્ટ અંગેની માહિતી જાહેર કરી છે. અંદાજે ₹૧,૧૮૨.૪૦ કરોડના ખર્ચે આ માર્ગનું વિસ્તરણ કરવામાં આવશે.

પ્રોજેક્ટ અંતર્ગત નવો બાયપાસ, કોંક્રીટ સર્વિસ રોડ, એક ફ્લાયઓવર, ત્રણ વાહન અંડરપાસ અને બે રેલવે ઓવરબ્રિજનું નિર્માણ કરવામાં આવશે. હાઈવે છ-માર્ગીય બનવાથી વાહનચાલકોને ટ્રાફિકની સમસ્યામાંથી રાહત મળશે અને વાહનવ્યવહાર વધુ સરળ બનશે.

આ માર્ગ અમૃતસર-જામનગર ઇકોનોમિક કોરિડોર તેમજ નવલખી બંદર માટે મહત્વપૂર્ણ કડી હોવાથી તેના વિસ્તરણથી બંદર પર માલસામાનની હેરફેરને વેગ મળશે. મોરબીના ઔદ્યોગિક વિસ્તારો, ધ્રોલ-આમરણ-માળિયા પટ્ટા અને આસપાસના કૃષિ ક્ષેત્રને પણ તેનો લાભ મળશે.

જામનગરની રિફાઇનરીઓમાંથી ઉત્તર ભારત તરફ જતા પેટ્રોકેમિકલ ઉત્પાદનોના પરિવહન માટે પણ આ માર્ગ મહત્વપૂર્ણ બનશે. હાઈવેના વિસ્તરણથી મુસાફરીનો સમય, ઈંધણ ખર્ચ અને ટ્રાફિક વિલંબમાં ઘટાડો થવાની સાથે મોરબી-રાજકોટ વિસ્તારના વેપાર, ઉદ્યોગ અને આર્થિક વિકાસને નવી દિશા મળશે.