(મુકુંદ બદિયાણી દ્વારા)જામનગર તા.૬ : આંતરરાષ્ટ્રીય કક્ષાની સંકલિત ડાઉનસ્ટ્રીમ એનર્જી અને પેટ્રોકેમિકલ્સ કંપની નયારા એનર્જીએ લાલપુર તાલુકાના મીઠોઈ ગામમાં 5.2 કિમી સિમેન્ટ કોંક્રિટ રોડનું બાંધકામ પૂર્ણ કરી ગામને અર્પણ કર્યો છે. આ પ્રોજેક્ટ 1,000થી વધુ લોકોની વસ્તી ધરાવતા મિઠોઈ ગામના રહેવાસીઓ માટે સુધારેલ કનેક્ટિવિટી અને રોજિંદી ગતિશીલતાને ટેકો આપવા માટે હાથ ધરવામાં આવ્યો છે.

સીસી રોડ ઉપરાંત, રાહદારીઓ માટે સલામત અને વધુ અનુકૂળ અવરજવર સુનિશ્ચિત કરવા માટે રસ્તાની બંને બાજુ પેવર બ્લોક ફૂટપાથ પણ વિકસાવવામાં આવ્યા છે. આ માળખાકીય સુવિધાથી ગામની અંદર દૈનિક મુસાફરી, શાળા-કોલેજના વિદ્યાર્થીઓની અવરજવર અને ખેડૂતોને ખેતપેદાશોની હેરફેરમાં મોટી રાહત થશે.

નયારા એનર્જીના કાર્યકારી ચેરમેન શ્રી પ્રસાદ પાનિકર અને નયારા એનર્જીના રિફાઇનરીના વડા શ્રી અમર કુમાર તથા નેતૃત્વ ટીમના સભ્યો દ્વારા આ સુવિધા ઔપચારિક રીતે ગામને સમર્પિત કરવામાં આવી હતી. આ પ્રસંગે ગામના પ્રતિનિધિઓ અને રહેવાસીઓએ નયારા એનર્જીની આ પહેલ માટે પ્રશંસા વ્યક્ત કરી હતી અને ગામની અંદર દૈનિક મુસાફરી અને પ્રવેશ પર તેની સકારાત્મક અસર પર પ્રકાશ પાડ્યો હતો.