(વિનોદ ગાલા દ્વારા) ભુજ તા.૨૮ :  ગાંધીધામના ચકચારી અપહરણ અને ખંડણી કેસમાં ચોંકાવનારો ખુલાસો થયો છે. કચ્છમાં ચકચાર અને ચર્ચા જગાવનાર આ કિસ્સામાં પહેલાં આંગડિયા પાસેથી ૨૦ લાખ મંગાવી અપાવ્યા બાદ છુટકારો થયો હોવાની ફરિયાદમાં નવો વળાંક આવ્યો છે અપહરણ કરનાર ટોળકીએ અપહૃત વ્યક્તિના દુબઈ રહેતા ભાઈ પાસેથી ડોલરમાં રૂપિયા પડાવી કરોડોની ખંડણી ઉઘરાવી પછી છુટકારો કર્યો હોવાનું પોલીસ તપાસમાં ખુલ્યું છે. પૂર્વ કચ્છ પોલીસના ગાંધીધામના ‘એ’ ડિવિઝન પોલીસ સ્ટેશન વિસ્તારમાંથી ટ્રાન્સપોર્ટના વેપારી દિલીપ ગોકળદાસ મજીઠીયાનું અપહરણ કરી કરોડો રૂપિયાની ખંડણી ઉઘરાવવાનો સનસનાટીભર્યો ગુનો ઉકેલવામાં પૂર્વ પોલીસને મોટી સફળતા મળી છે. પોલીસે આ ચકચારી ગુનામાં સંડોવાયેલા કુલ ૭ આરોપીઓની ધરપકડ કરી છે, જ્યારે ૩ આરોપીઓ હજુ ફરાર છે. સમગ્ર બનાવની વિગત વાત કરીએ તો ગત ૨૧ જુલાઈ ૨૦૨૬ના રોજ મુખ્ય આરોપી જાવેદ અને તેના અન્ય બે સાગરીતોએ પૂર્વ આયોજિત ષડયંત્ર રચીને ૩૫ વર્ષીય ટ્રાન્સપોર્ટર દિલીપ ગોકળદાસ મજીઠિયાનું ફોસલાવીને કારમાં અપહરણ કર્યું હતું. ત્યારબાદ અપહૃત ટ્રાન્સપોર્ટરને ગાંધીધામના સપનાનગર ખાતે આવેલા એક મકાનમાં લઈ જઈ દોરડા વડે બાંધી ઢોર માર માર્યો હતો અને જાનથી મારી નાખવાની ધમકી આપી હતી. ત્યારબાદ,આરોપીઓએ દુબઈ રહેતા વેપારીના ભાઈ નરેશભાઈ ઉર્ફે લાલો મજેઠીયાને વિડીયો કોલ કરી તેના ભાઈને મારી નાખવાની ધમકી આપી રૂપિયાની માંગણી કરી હતી હતી. આરોપી જાવેદે સ્કેનર મોકલીને કુલ ૫,૮૪,૫૦૦ USDT (જેની ભારતીય ચલણ મુજબ કિંમત રૂપિયા ૫,૫૫,૨૭,૫૦૦/- ની રકમ પોતાના ખાતામાં ટ્રાન્સફર કરાવી લીધી હતી. આ સિવાય અગાઉ આરોપીઓએ દર્શાવેલા ભયને કારણે ફરિયાદી પાસેથી આંગડિયા મારફતે રૂ. ૨૦ લાખની પણ માગણી કરવામાં આવી હતી.પોલીસે બનાવની ગંભીરતાને ધ્યાને રાખીને સરહદી રેન્જ ભુજના આઈજીપી ચિરાગ કોરડિયા અને પૂર્વ કચ્છ ગાંધીધામના એસપી સાગર બાગમારની સૂચનાથી અંજાર વિભાગના ડીવાયએસપી મુકેશ ચૌધરીના માર્ગદર્શન હેઠળ અલગ-અલગ ૧૦ ટીમોની રચના કરી હતી. એલસીબી પીઆઈ જે.એમ. વાળા અને ‘એ’ ડિવિઝન પીઆઈ એમ.જે. રાઠોડની આગેવાની હેઠળની ટીમોએ સીસીટીવી ફૂટેજ તથા ટેકનિકલ સર્વેલન્સના આધારે દરોડા પાડીને ગુનામાં સામેલ ૭ આરોપીઓની ધરપકડ કરી હતી જેમાં હર્ષ કિશોર સદાદપુરી (ઉં.વ. ૩૯, રહે. બીકાનેર, મુળ મેઘપર બોરીચી) રાજભાઈ દિપક ધનવાણી (ઉં.વ. ૨૨, રહે. આદિપુર)ઇબ્રાહીમ જુસબ બુચડ (ઉં.વ. ૩૪, રહે. ખારીરોહર, ગાંધીધામ)હુશેન જુસબ બુચડ (ઉં.વ. ૨૮, રહે. જુહાપુરા અમદાવાદ, મુળ ખારીરોહર)શબીર અભુભાઈ સાયચા (ઉં.વ. ૨૯, રહે. જુહાપુરા અમદાવાદ, મુળ સપનાનગર ગાંધીધામ)લક્ષ્મણ ઉર્ફે લચ્છુ લીલારામ હેમનાણી (ઉં.વ. ૩૨, રહે. આદિપુર)સચીન વિકાસ આનંદાની (ઉં.વ. ૨૪, રહે. આદિપુર) ને ઝડપી પાડ્યા હતા જ્યારે આ મામલે જાવેદ અભુ સાયચા (રહે. સપનાનગર, ગાંધીધામ)રીઝવાન હુસેન ખીચા (રહે. સપનાનગર, ગાંધીધામ) સોહિલ જુસબ બુચડ (રહે. તુણા વંડી, અંજાર) ની તપાસ દરમ્યાન સંડોવણી ખુલી છે જેને પકડવા માટે ચક્રો ગતિમાન કર્યા છે.પોલીસ રોકડા રૂ. ૯,૬૮,૦૦૦/- કુલ ૧૧ મોબાઈલ ફોન (કિંમત રૂ. ૨,૭૫,૫૦૦/-) સહિતનો મુદ્દામાલ કબજે કર્યો છે.પોલીસની પ્રાથમિક તપાસમાં બહાર આવ્યું છે કે પકડાયેલા તેમજ ફરાર મોટાભાગના આરોપીઓ ભૂતકાળમાં સાયબર ક્રાઈમ, દારૂની હેરાફેરી (પ્રોહિબિશન), મારામારી, જુગાર તથા પેટ્રોલિયમ પાઇપલાઇન ચોરી જેવા અનેક ગુનાઓમાં સપડાયેલા છે. પૂર્વ કચ્છ પોલીસે ફરાર ત્રણેય આરોપીઓને ઝડપી પાડવા ચક્ર ગતિમાન કર્યા છે. જો કે હાલ આ મામલે આરોપી ઝડપાઈ ગયા છે પરંતુ જેમ જેમ તપાસ આગળ વધશે તેમ અનેક નવા ચોંકાવનારા ખુલાસા થઈ શકે છે. વધુ આરોપી ની સંડોવણી સાથે તપાસ નો વિષય એ પણ રહેશે કે કરોડો રૂપિયાના ક્રિપ્ટો ફરિયાદી પાસે કઈ રીતે હતા આમ વિવિધ દિશામાં પોલીસે તપાસ શરૂ કરી છે.પોલીસે આરોપી ને પકડ્યા બાદ જે જગ્યાએ આરોપીએ પોલીસની આબરૂના ધજાગરા ઉડાડી અપહરણ કર્યું હતું ત્યાં લઈ જઈ પોલીસે આરોપીને સાથે રાખી ઘટનાનું રીકનસ્ટ્રકશન કર્યું હતું.

ભરચક વિસ્તારમાંથી થયેલ વેપારીના અપહરણમાં આ મામલાએ પૂર્વ કચ્છની કાયદો વ્યવસ્થાની સ્થિતિ સામે ગંભીર સવાલો ઊભા કર્યા હતા જો કે હવે એક સપ્તાહ બાદ પોલીસે આ મામલે ૭ શખ્સોને ઝડપી ગુન્હેગારો પર ધાક બેસાડતી કામગીરી કરી છે. જો કે હવે તપાસ દરમ્યાન વધુ શું બહાર આવે છે એ જોવું રહ્યું. (તસ્વીર: મુકેશ રાજગોર, રાપર)