(જયેશ ભટ્ટાસણા દ્વારા)ટંકારા તા.૨૩ :ગુજરાતના હવામાનમાં અચાનક પલટો આવવાની સંભાવના છે. રાજ્યના જાણીતા યુવા વેધરમેન ઉત્તમ માળીની આગાહી અનુસાર, આજે સૌરાષ્ટ્ર અને ગુજરાતના કેટલાક છૂટાછવાયા વિસ્તારોમાં પ્રી-મોન્સૂન એક્ટિવિટી જોવા મળી શકે છે. 

વેધરમેનની આગાહી મુજબ, ખાસ કરીને સૌરાષ્ટ્રના ચાર પ્રમુખ જિલ્લાઓ રાજકોટ, બોટાદ, અમરેલી અને ભાવનગરમાં વાતાવરણમાં મોટો ફેરફાર જોવા મળશે. આ વિસ્તારોમાં પવનની તીવ્ર ગતિ અને ગાજવીજ સાથે વરસાદી ઝાપટાં પડવાની પ્રબળ સંભાવના છે. 

આજે અમરેલી, રાજકોટ અને બોટાદ સુધીના વિસ્તારોમાં 'લો લેવલ' ભેજ સારી માત્રામાં ફેલાયેલો છે. આ સાનુકૂળ સ્થિતિને કારણે બપોર બાદ વાતાવરણમાં અચાનક પલટો આવશે. પરિણામે, ધૂળની ડમરીઓ અને ભારે પવન ફૂંકાવા સાથે આકાશમાં વીજળીના કડાકા-ભડાકા સાથે વરસાદી માહોલ જામશે. 

ખેડૂતોને તથા નાગરિકોને હવામાન વિભાગ દ્વારા સાવચેત રહેવા અને બિનજરૂરી બહાર ન નીકળવા અપીલ કરવામાં આવી છે.