રાજકોટ, તા. 21 : ગઈકાલે સાંજના સમયે સૌરાષ્ટ્રના વાતાવરણમાં અચાનક પલટો આવ્યો હતો. રાજકોટ-જેતપુર હાઈવે પર મેઘરાજાએ ધમાકેદાર એન્ટ્રી કરી હતી.

મળતી માહિતી મુજબ, સાંજના સમયે વીરપુર (જલારામ), ગોંડલ, ચોરડી, જેતપુર સહિતના વિસ્તારોમાં ગાજવીજ અને ભારે પવન સાથે જોરદાર વરસાદ વરસ્યો હતો. અચાનક વરસેલા વરસાદને કારણે હાઈવે પરથી પસાર થતા વાહનચાલકોને ભારે હાલાકીનો સામનો કરવો પડ્યો હતો.

દરમિયાન, ચરખડીના પાટિયા પાસે વીજળી પડવાની ઘટના પણ બની હતી. જોકે, સદનસીબે આ ઘટનામાં કોઈ જાનહાનિના સમાચાર નથી.

છેલ્લા ઘણા દિવસોથી વરસાદે વિરામ લીધો હતો ત્યારે ગઈકાલે પડેલા આ વરસાદથી ખેડૂતોમાં ખુશીની લહેર ફરી વળી છે.