ભાવનગર પંથકમાં ભારે હાહાકાર મચાવનાર ચકચારી લઠ્ઠાકાંડ પ્રકરણમાં પોલીસ અને એસએમસી (SMC) ની તપાસ સતત આગળ વધી રહી છે. આ ગંભીર કેસમાં અગાઉ મુખ્ય સૂત્રધાર ગૌતમ સોલંકી અને રઈશ અન્સારી સહિતના 14 આરોપીઓના રિમાન્ડ પૂરા થતા તેમને અગાઉ જ્યુડિશિયલ કસ્ટડી (જેલ હવાલે) મોકલી આપવામાં આવ્યા હતા.

આ કડીને આગળ ધપાવતા આજે આનંદ છાંડી સહિતના વધુ 13આરોપીઓની પોલીસ રિમાન્ડની મુદત પૂર્ણ થઈ હતી, જેને લઈને તેમને કડક સુરક્ષા વચ્ચે કોર્ટમાં રજૂ કરવામાં આવ્યા હતા. તપાસ દરમિયાન પોલીસ દ્વારા આ આરોપીઓના વધુ રિમાન્ડ (ફરધર રિમાન્ડ) ની માંગ કરવામાં આવી ન હતી, જેને પગલે કોર્ટે તમામ 13 આરોપીઓને ન્યાયિક હિરાસતમાં મોકલી આપવાનો હુકમ કર્યો છે અને આ સાથે જ આ તમામ આરોપીઓ હવે જેલ હવાલે થયા છે. ઝેરી પ્રવાહીકાંડના આ નેટવર્કમાં સંડોવાયેલા મોટાભાગના આરોપીઓ હવે એક પછી એક જેલના સળિયા પાછળ ધકેલાઈ રહ્યા છે.