ફુલકાજળી:શ્રાવણ સુદ ત્રીજના પાવન અવસરે ફુલકાજળી વ્રતના પર્વ નિમિત્તે શ્રી ખીરેશ્વર મહાદેવ મંદિર ખાતે કુવારીકાઓ દ્વારા ભક્તિભાવપૂર્વક વિશેષ પૂજન-અર્ચન કરવામાં આવ્યું હતું. વહેલી સવારે સ્નાન આદિ વિધિ પૂર્ણ કરીને સ્થાનિક અને આસપાસના વિસ્તારોમાંથી મોટી સંખ્યામાં ઉમટી પડેલી યુવતીઓએ દેવાધિદેવ મહાદેવ તથા જગતજનની માતા પાર્વતીના ચરણોમાં શિશ ઝુકાવીને પોતાના અખંડ સૌભાગ્ય અને ઉત્તમ જીવનસાથીની કામના સાથે વ્રતની વિધિવત શરૂઆત કરી હતી.

આ પરંપરાગત વ્રતની વિગતો મુજબ, શ્રાવણ માસના આ વિશેષ દિવસે કુવારીકાઓ દ્વારા આખો દિવસ ઉપવાસ કે નકોરડા જેવી શ્રદ્ધાપૂર્વકની સાધના કરવામાં આવે છે. આ વ્રતની વિશેષતા એ છે કે આખો દિવસ કોઈપણ પ્રકારના ફળાહાર કે પાણીનું ગ્રહણ કરતા પહેલાં સર્વપ્રથમ તાજાં ફુલ સૂંઘવાની વિધિ કરવામાં આવે છે. મંદિરના પ્રાંગણમાં એકત્રિત થયેલી યુવતીઓએ ફૂલોની સુગંધ સાથે મહાદેવની આરાધના કરી ધન્યતા અનુભવી હતી.

આ પ્રસંગે ઉપસ્થિત ધર્મપ્રેમીઓ અને વ્રત કરનાર યુવતીઓએ પોતાના અનુભવ વ્યક્ત કરતા જણાવ્યું હતું કે આ પ્રકારના ધાર્મિક અને સાંસ્કૃતિક વ્રતો કરવાથી મનને શાંતિ મળે છે તેમજ આપણી સનાતન સંસ્કૃતિની પરંપરાઓ જીવંત રહે છે. વ્રત કરનાર કુવારીકાઓએ શ્રદ્ધા વ્યક્ત કરી હતી કે ભક્તિપૂર્વક કરવામાં આવતી આવી સાધનાથી જીવનમાં સકારાત્મક ઉર્જાનો સંચાર થાય છે અને માનવીનું જીવન ફૂલોની જેમ સદા માટે મહેંકી ઉઠે છે.

સનાતન ધર્મમાં શ્રાવણ માસના તહેવારોનું વિશેષ મહુત્વ રહેલું છે ત્યારે આવા પારંપરિક વ્રતો અને ધાર્મિક ઉત્સવો થકી યુવા પેઢીમાં આપણી સંસ્કૃતિ અને સંસ્કારોનું સિંચન થાય છે. શ્રી ખીરેશ્વર મહાદેવ મંદિર ટ્રસ્ટ દ્વારા આગામી દિવસોમાં શ્રાવણ માસ દરમિયાન આવનારા અન્ય તહેવારો અને પર્વો નિમિત્તે પણ ભક્તો માટે વિશેષ દર્શન તથા મહાઆરતી જેવા આયોજનોની રૂપરેખા તૈયાર કરવામાં આવી છે.