(ચંદ્રેશ હિરાણી દ્વારા)મોટી પાનેલી તા.૧૩ : પાનેલી પાસે સીદસર રોડ ઉપર ઇન્ડિયન હોટલ પાસે આજે સવારે એક ગમખ્વાર અકસ્માત સર્જાયો હતો. એસ.ટી. બસ અને તુલસી ટ્રાવેલ્સની ખાનગી બસ વચ્ચે સામસામે ટક્કર થતાં ઘટનાસ્થળે અફરાતફરી મચી ગઈ હતી.

આ અકસ્માતમાં પ્રાથમિક માહિતી અનુસાર ૮ થી ૧૦ લોકો ઈજાગ્રસ્ત થયા હતા. ત્યારબાદ મળતી વધુ વિગતો મુજબ એક વૃધ્ધાનું મોત નિપજ્યું છે અને ૧૦થી ૧૨ લોકોને ઈજા પહોંચી છે.

તમામ ઈજાગ્રસ્તોને તાત્કાલિક ધોરણે સારવાર અર્થે હોસ્પિટલમાં ખસેડવામાં આવ્યા હતા. જ્યારે એસ.ટી. બસના ડ્રાઈવરને વધુ ગંભીર ઈજા પહોંચતા ઉપલેટા હોસ્પિટલથી વધુ સારવાર અર્થે જુનાગઢ રીફર કરવામાં આવ્યા છે.

ઘટનાની જાણ થતા પોલીસ કાફલો ઘટનાસ્થળે દોડી ગયો હતો અને અકસ્માત અંગે વધુ તપાસ હાથ ધરી છે.