દેવભૂમિ દ્વારકા  : જિલ્લાના ભાણવડ શહેરમાંથી માનવતા અને સમયસૂચકતાનું ઉત્તમ ઉદાહરણ પૂરું પાડતી એક ઘટના સામે આવી છે. અહીં એક કદાવર આખલો અચાનક ભૂગર્ભ પાણીના ટાંકા (ભોં-ટાકા) માં ખાબક્યો હતો. ટાંકો ઊંડો હોવાના કારણે આખલો પોતાની જાતે બહાર નીકળી શકે તેમ નહોતો અને જીવ બચાવવા તરફડિયાં મારી રહ્યો હતો. જોકે, સ્થાનિક લોકો અને બચાવ ટુકડીની કલાકોની ભારે જહેમત બાદ આ અબોલ જીવને હેમખેમ બહાર કાઢવામાં સફળતા મળી છે.
​કલાકો સુધી ચાલ્યું દિલધડક રેસ્ક્યુ ઓપરેશન
​ઘટનાની જાણ થતાં જ આસપાસના સ્થાનિક રહીશો અને ગૌભક્તો તાત્કાલિક ઘટનાસ્થળે દોડી આવ્યા હતા. ટાંકો સાંકડો અને ઊંડો હોવાને કારણે આખલાને બહાર કાઢવો એ મોટો પડકાર હતો. પ્રાથમિક અંદાજ લગાવ્યા બાદ જેસીબી (JCB) મશીન અને ક્રેનની મદદ લેવામાં આવી હતી. આખલાને કોઈ ગંભીર ઇજા ન પહોંચે તે રીતે કાળજીપૂર્વક મજબૂત દોરડા વડે બાંધીને ક્રેન દ્વારા ઉપર ખેંચવાનું ઓપરેશન શરૂ કરાયું હતું.
​જીવના જોખમે અબોલ જીવને નવજીવન આપ્યું
​ભારે જહેમત અને કલાકોની કવાયત બાદ આખલાને કોઈ પણ મોટી ઇજા વગર સુરક્ષિત રીતે ટાંકામાંથી બહાર કાઢી લેવામાં આવ્યો હતો. આખલો બહાર આવતા જ હાજર સૌ કોઈએ રાહતનો શ્વાસ લીધો હતો અને સ્થાનિકોએ બચાવ કામગીરી કરનારાઓની કામગીરીને બિરદાવી હતી. પ્રાથમિક તપાસ બાદ આખલાની તબિયત સારી હોવાનું જાણવા મળ્યું છે. આ સફળ રેસ્ક્યુ ઓપરેશનનો વીડિયો પણ સોશિયલ મીડિયા પર ખુબ પ્રશંસા પામી રહ્યો છે.