રાજકોટ, તા.૦૩: રાજકોટ જિલ્લાના જેતપુર તાલુકા હેઠળ આવેલા કાગવડ અને ખંભાલીડા ગામ વચ્ચેની સીમ વિસ્તારમાં એકસાથે ત્રણ સિંહોનો પરિવાર મુક્તપણે લટાર મારતો નજરે પડતાં જ સ્થાનિક ખેડૂતો, ખેતમજૂરો અને ગ્રામજનોમાં ભય તથા ફફડાટનો માહોલ સર્જાયો છે.

પ્રાપ્ત વિગતો અનુસાર, કાગવડ-ખંભાલીડા પંથકના ખુલ્લા ખેતરોમાં ત્રણ સાવજ મુક્તપણે ફરી રહ્યા હોવાના વીડિયો સોશિયલ મીડિયા પર વાયરલ થયા બાદ સમગ્ર ગ્રામીણ વિસ્તારમાં ચિંતાનું મોજું ફરી વળ્યું છે.

ઘટનાની વિગતવાર માહિતી આપતા સ્થાનિક ખેડૂતોએ જણાવ્યું હતું કે હાલ ખેતીની સિઝન પૂરજોશમાં ચાલી રહી હોવાથી રાત-દિવસ ખેતરોમાં કામ કરવું જરૂરી છે, પરંતુ સીમમાં વનરાજોની હાજરીના કારણે શ્રમિકો ખેતરે જતાં ડરી રહ્યા છે.

કોઈ અનિચ્છનીય બનાવ ન બને તે માટે વન વિભાગ દ્વારા તાત્કાલિક આ બાબતની ગંભીર નોંધ લેવામાં આવે અને રેડિયો કોલર કે ટ્રેકિંગ દ્વારા સિંહોની હિલચાલ પર સતત નજર રાખીને રાત્રિ પેટ્રોલિંગ હાથ ધરવામાં આવે તેવી લોક માંગ ઉઠી છે.

ભૂતકાળની વાત કરીએ તો ગત મહિને ગીર સોમનાથ જિલ્લાના કોડીનાર તાલુકાના વલાદર ગામે આંગણામાં સૂતેલા યુવાન પર સિંહણે હુમલો કરીને જીવલેણ ઇજા પહોંચાડી હતી, જેના કારણે ગ્રામીણ વિસ્તારોમાં અવારનવાર સર્જાતી સિંહોની હાજરીથી લોકોમાં ભારે દહેશત વ્યાપેલી છે.

આગામી સમયમાં વન વિભાગ દ્વારા સીમ વિસ્તારમાં ટ્રેકિંગ ટીમ તૈનાત કરીને સિંહોની ગતિવિધિ પર રાઉન્ડ ધ ક્લોક નજર રાખવામાં આવે તેવી પૂરી શક્યતા દર્શાવાઈ રહી છે.