વાંકાનેર : વાંકાનેર અને ટંકારા પંથકમાં અપમૃત્યુના સતત બનાવો સામે આવી રહ્યા છે, જેમાં વાંકાનેરના ભીમગુડા ગામે બેલાની ખાણમાં કામ કરતા સમયે વીજશોક લાગવાથી અને પાણીમાં ડૂબી જવાથી એક આધેડનું મોત નીપજ્યું છે, જ્યારે ટંકારાના કોઠારીયા અને ધ્રુવનગર ગામે ઝેરી દવા પીવાથી એક પરિણીતા સહિત બે આધેડોના કરૂણ મોત થયા છે.

પ્રાપ્ત વિગતો અનુસાર, મૂળ ઉત્તર પ્રદેશના વતની અને હાલ વાંકાનેર તાલુકાના ભીમગુડા ગામની સીમમાં બેલાની ખાણમાં મજૂરી કરતા ૪૭ વર્ષના સુનીલકુમાર જગતનારાયણ બિંદ ખાણમાં કામ કરી રહ્યા હતા તે દરમિયાન અકસ્માતે વીજશોક લાગતા તેઓ બાજુમાં આવેલી ૨૫ ફૂટ ઊંડી પાણી ભરેલી ખાણમાં પડી ગયા હતા અને ડૂબી જવાથી તેમનું મોત થયું હતું, જે બાબતે વાંકાનેર તાલુકા પોલીસે ફરિયાદ નોંધીને તપાસ હાથ ધરી છે.

આ ઉપરાંત બીજી ઘટના ટંકારાના કોઠારિયા ગામે બની હતી, જ્યાં મૂળ મધ્યપ્રદેશના વતની અને કોઠારીયા ગામની સીમમાં વાડીએ રહીને મજૂરી કરતી ૩૫ વર્ષીય મડીબાઈ નવલસિંહ બુંદેડીયા નામની પરિણીતાએ કોઈ અનાયાસે અથવા અગમ્ય કારણોસર પોતાની જાતે ઝેરી દવા પી લીધી હતી, જેને ગંભીર હાલતમાં સારવાર માટે હોસ્પિટલ ખસેડવામાં આવ્યા બાદ સારવાર દરમિયાન તેમનું કરૂણ મોત નીપજ્યું હતું.

આજ ક્રમમાં ત્રીજી દુર્ઘટના ટંકારાના ધ્રુવનગર ગામની સીમમાં બની હતી, જેમાં મૂળ મધ્યપ્રદેશના વતની અને ખેતરમાં વાડીએ રહીને મજૂરી કરતા ૫૦ વર્ષીય લક્ષ્મણભાઈ વેલજીભાઈ માવી નામના આધેડે કોઈ કારણોસર ખેતરમાં છાંટવાની ઝેરી દવા પી લેતા તેમને તાત્કાલિક હોસ્પિટલ ખસેડાયા હતા જ્યાં સારવાર દરમિયાન તેમનું પણ મોત થયું છે અને પોલીસે આ તમામ મામલાઓમાં કાયદેસરની કાર્યવાહી હાથ ધરી છે.