મોડાસા: અરવલ્લી જિલ્લામાં ખેડૂતોને ઊંચા ભાડાની લાલચ આપી ભાડા કરારના નામે ટ્રેક્ટરો મેળવીને મોટી છેતરપિંડી આચરતી શાતીર ગેંગનો સ્થાનિક ગુના શોધક શાખા (LCB), માલપુર અને મેઘરજ પોલીસની સંયુક્ત ટીમે પર્દાફાશ કર્યો છે. પોલીસે આ કૌભાંડમાં સંડોવાયેલા ૬ આરોપીઓની અટકાયત કરી રૂ. ૪ કરોડથી વધુનો મુદ્દામાલ કબ્જે કરીને કાયદેસરની ધોરણસરની કાર્યવાહી હાથ ધરી છે.

પોલીસની પ્રાથમિક તપાસમાં બહાર આવ્યા મુજબ, આ આરોપીઓ ખેડૂતો પાસેથી ભાડેથી ટ્રેક્ટર લઈ તેને સૌરાષ્ટ્ર વિસ્તારમાં સસ્તા ભાવે વેચી મારીને મોટી ઠગાઈ આચરતા હતા. માલપુર અને મેઘરજ પોલીસ મથકે નોંધાયેલી ફરિયાદોના આધારે કાર્યવાહી કરતા પોલીસે ૨૦ ટ્રેક્ટર, ૧ જેસીબી અને ૧૦ ટોલી મળી કુલ ₹૪ કરોડથી વધુની કિંમતનો મુદ્દામાલ જપ્ત કર્યો છે.

ઝડપાયેલા તમામ ૬ આરોપીઓને કોર્ટમાં રજૂ કરવામાં આવતા કોર્ટે તેમના ૩ દિવસના રિમાન્ડ મંજૂર કર્યા છે. આ અંગે જિલ્લા પોલીસ વડા મનોહરસિંહ જાડેજાએ વિગતો આપતાં જણાવ્યું હતું કે, રિમાન્ડ દરમિયાન આ કૌભાંડમાં સંડોવાયેલા અન્ય શખ્સો સુધી પહોંચવા માટે પોલીસે તપાસના ચક્રો ગતિમાન કર્યા છે.

ગ્રામીણ વિસ્તારોમાં ભોળા ખેડૂતોને કમાણીની લાલચ આપી વાહનો મેળવી બારોબાર વેચી દેવાના આવા કૌભાંડો અગાઉ પણ અનેક જિલ્લાઓમાં સામે આવી ચૂક્યા છે. પોલીસ તંત્ર દ્વારા વાહન માલિકો અને ખેડૂતોને કોઈપણ વ્યક્તિ સાથે ભાડા કરાર કરતા પહેલા સંપૂર્ણ ચકાસણી કરવાની અપીલ કરવામાં આવી છે.

હાલમાં પોલીસ દ્વારા જપ્ત કરાયેલા વાહનોના મૂળ માલિકોની ઓળખ કરી તેમને વાહનો પરત સોંપવાની પ્રક્રિયા હાથ ધરવામાં આવી રહી છે. આ ઉપરાંત રિમાન્ડ દરમિયાન આરોપીઓની કડક પૂછપરછ કરીને સૌરાષ્ટ્રમાં વાહનો ખરીદનાર દલાલો અને અન્ય સાગરીતોની પણ ધરપકડ કરવામાં આવે તેવી પૂરેપૂરી શક્યતા છે.