<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Tuesday, 3rd November 2026

આપણી શકિત મુજબ કોઇના જીવનમાં આશાનું કિરણ બનવું તે સાચી માનવતા

પોરબંદરઃ સમાજમાં દરેક વ્‍યક્‍તિને જીવનમાં આગળ વધવાની સમાન તક મળવી જોઈએ, પરંતુ આર્થિક સંકડામણ, બીમારી અને પારિવારિક જવાબદારીઓ ઘણીવાર વ્‍યક્‍તિના સપનાઓની આડે આવે છે. આવા સમયે કોઈ એક વ્‍યક્‍તિ કે સેવાભાવી સંસ્‍થા દ્વારા કરવામાં આવેલી નાનકડી મદદ પણ આખા પરિવારના જીવનમાં મોટું પરિવર્તન લાવી શકે છે.કારણ કે મદદ માત્ર એક વ્‍યક્‍તિ સુધી સીમિત રહેતી નથી, પરંતુ તેની અસર આવનારી પેઢીઓ સુધી પહોંચે છે.સમાજમાં સંપત્તિવાન બનવું એ જ સફળતા નથી, પરંતુ પોતાની ક્ષમતા મુજબ કોઈના જીવનમાં આશાનું કિરણ બનવું એ સાચી માનવતા છે.

ઘણીવાર કોઈ ગરીબ પરિવારનો તેજસ્‍વી વિદ્યાર્થી માત્ર આર્થિક મુશ્‍કેલીના કારણે અભ્‍યાસ છોડી દેવા મજબૂર બને છે. જો આવા સમયે કોઈ દાતા, સેવાભાવી વ્‍યક્‍તિ કે સંસ્‍થા તેની શિક્ષણની જવાબદારી ઉપાડી લે તો તે બાળકનું ભવિષ્‍ય બદલાઈ શકે છે. શિક્ષિત બનેલી આ વ્‍યક્‍તિ આગળ જતાં પોતાના પરિવારને આર્થિક રીતે સધ્‍ધર બનાવવાની સાથે સમાજમાં પણ યોગદાન આપી શકે છે. આરોગ્‍ય ક્ષેત્રે કરવામાં આવતી મદદનું પણ વિશેષ મહત્ત્વ છે.ગરીબ પરિવારના કોઈ સભ્‍યને ગંભીર બીમારી થાય ત્‍યારે સારવારનો ખર્ચ આખા પરિવાર માટે મોટો પડકાર બની જાય છે.આવા સમયે સમયસર મળતી આર્થિક સહાય કોઈ વ્‍યક્‍તિને નવું જીવન આપી શકે છે.એક વ્‍યક્‍તિ સ્‍વસ્‍થ થાય એટલે માત્ર તેનું જીવન જ નહીં, પરંતુ તેના પર નિર્ભર સમગ્ર પરિવારનું જીવન પણ ફરીથી પાટા પર આવી શકે છે.(૨૩.૯)

રામદેવભાઇ મોઢવાડિયા

પોરબંદર હેલ્‍થ એજયુકેશન ટ્રસ્‍ટ

(1:21 PM IST)