રાજકોટ તા. ર૯ :.. ગોંડલના મોવીયા રોડ પર અજાણ્‍યો વાહનના ચાલક રોડ પર બેસેલી ૩ ગાયને કચડી ભાગી  જતાં ગોંડલ શહેર પોલીસ મથકમાં ફરીયાદ નોંધાઇ છે. આ અંગે ગોંડલના કિશોર યુવક ગૌ સેવા ચેરીટેબલ ટ્રસ્‍ટ સાથે સંકળાયેલા અને ગોંડલ તાલુકાના નાગડકા ગામે રહેતા અરવિંદભાઇ ભીખાભાઇ રાઠોડ (ઉ.૩૩) એ નોંધાવેલી ફરીયાદમાં જણાવ્‍યુ કે, ગોંડલના મોવીયા રોડ પર મેઘવાળ સમાજના સ્‍મશાન પાસે રોડ પર અજાણ્‍યો વાહનનો ચાલકે રસ્‍તા પર ગાયો સાથે અકસ્‍માત કર્યો હોવાની જાણ થતા તે ત્‍યાં પહોંચ્‍યા હતાં. જયાં એક ગાય અને એક વાછરડીના મોત નિપજયા હતાં. જયારે એક ગાય જીવીત હોવાથી તેને સારવાર માટે ગૌશાળાએ લઇ જતા હતા ત્‍યારે તેનું રસ્‍તામાં મોત નિપજયુ હતું. ગોંડલના હેડ કો. સી. આર. રોજાસરાએ આ મામલે ગુનો દાખલ કરી વધુ તપાસ હાથ ધરી છે.