નવી દિલ્હી:૨૦૨૬ના ફિફા વર્લ્ડ કપ દરમિયાન સહ-યજમાન યુનાઇટેડ સ્ટેટ્સ (યુએસએ) દ્વારા ઈરાની ટીમ પર લાદવામાં આવેલા કડક મુસાફરી પ્રતિબંધોને કારણે મોટો વિવાદ સર્જાયો છે. ઈરાની ફૂટબોલ ફેડરેશને આ પ્રતિબંધો અંગે કડક શબ્દોમાં નિરાશા વ્યક્ત કરી છે અને ફૂટબોલની વૈશ્વિક સંસ્થા 'ફિફા' (FIFA) સમક્ષ સત્તાવાર રીતે ફરિયાદ નોંધાવવાનો નિર્ણય કર્યો છે.નવા વિઝા નિયમો અને પ્રતિબંધો હેઠળ, ઈરાની ખેલાડીઓને મેચના માત્ર એક દિવસ પહેલા જ યુનાઇટેડ સ્ટેટ્સમાં પ્રવેશવાની મંજૂરી આપવામાં આવી છે. એટલું જ નહીં, મેચ સમાપ્ત થતાંની સાથે જ તે જ દિવસે તેમણે દેશ છોડવો પડે તેવી આકરી શરત પણ મૂકવામાં આવી છે. ફેડરેશનના મતે, આ શરત આગામી સમયમાં બેલ્જિયમ સામે રમાનારી મહત્વની મેચ માટે ઈરાની ટીમની રણનીતિ અને તૈયારીઓને ભારે નુકસાન પહોંચાડી શકે છે.