મુંબઈ : T20 વર્લ્ડ કપ 2024માં ભારત અને યુએસએ વચ્ચે મેચ રમાઈ રહી છે. આ મેચમાં શરૂઆતથી જ ભારતીય બોલરો અમેરિકન ટીમના બેટ્સમેનો પર પ્રભુત્વ જમાવતા જોવા મળ્યા હતા. ભારતીય ટીમના બોલર જસપ્રિત બુમરાહે પોતાનું શાનદાર પ્રદર્શન જારી રાખ્યું છે.

   જસપ્રિત બુમરાહે ઇનિંગ્સના પહેલા જ બોલ પર યુએસએના ઓપનર શયાન જહાંગીરને આઉટ કરીને બેકફૂટ પર ધકેલી દીધો હતો. પ્રથમ ઓવરના છેલ્લા બોલ પર જસપ્રીત બુમરાહે અમેરિકાના દિગ્ગજ બેટ્સમેન એન્ડ્રેસ ગૌસની વિકેટ લઈને યુએસએ ટીમની બેટિંગની કમર તોડી નાખી હતી.

  ભારતીય બોલરો માત્ર પોતાના પ્રદર્શનથી મેચ પર પ્રભુત્વ જમાવી રહ્યાં નથી, આ સાથે ભારતીય ટીમ શાનદાર ફિલ્ડિંગ પણ કરી રહી છે. ભારતીય બોલર મોહમ્મદ સિરાજે ભલે મેચમાં વિકેટ ન લીધી હોય, પરંતુ તેણે સુપરમેન બનીને મેચમાં આશ્ચર્યજનક કેચ લઈને ચાહકોનું દિલ જીતી લીધું છે. મોહમ્મદ સિરાજે યુએસએના ખેલાડી નીતિશ કુમારનો આ આશ્ચર્યજનક કેચ પકડ્યો છે.

 ભારતીય ટીમ માટે 15મી ઓવર નાખવા આવેલા બોલર અર્શદીપ સિંહના ચોથા બોલ પર નીતિશ કુમારે લેગ સાઇડમાં પુલ શોટ રમ્યો હતો. 133.2 કિમી/કલાકની ઝડપ ધરાવતો આ બોલ બેટને અથડાયા બાદ હવામાં જ રહ્યો, જેને ડીપ સ્ક્વેર લેગ પર ઉભેલા મોહમ્મદ સિરાજે થોડો પાછળ જઈને સારો કૂદકો માર્યો. મોહમ્મદ સિરાજે બાઉન્ડ્રીની બરાબર પહેલા પાછળની તરફ કૂદીને આ અદ્ભુત કેચ લીધો હતો.

 નીતિશ કુમાર 23 બોલમાં 27 રન બનાવીને રમી રહ્યો હતો. નીતીશે પોતાની ઇનિંગમાં 2 ચોગ્ગા અને 1 છગ્ગા ફટકાર્યા હતા. સિરાજનો આ શાનદાર કેચ થોડીવારમાં જ સોશિયલ મીડિયા પર વાયરલ થઈ ગયો. મોહમ્મદ સિરાજના આ શાનદાર કેચની ભારતીય ટીમના ચાહકો પ્રશંસા કરી રહ્યા છે. તમે પણ જુઓ આ અદ્ભુત કેચનો વીડિયો