<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Thursday, 27th June 2024

રોહિતે ઇન્‍ઝમામને આપ્‍યો જડબાતોડ જવાબ કહ્યું તમે તમારૂ મગજ ખુલ્લુ રાખો

ઇન્‍ઝમામ ઉલહકે અર્શદીપ ઉપર બોલ ટેમ્‍પરીંગનો આરોપ લગાવ્‍યો'તો

નવી દિલ્‍હી,તા.૨૭: ભારતીય કેપ્‍ટન રોહિત શર્માએ ઇન્‍ઝમામ ઉલ હકના આરોપનો જડબાતોડ જવાબ આપ્‍યો છે. પાકિસ્‍તાનના ઇંઝમામ ઉલ હકે ટી૨૦ વર્લ્‍ડ કપની મેચમાં ભારતની ઓસ્‍ટ્રેલિયા પર જીત બાદ ભારતીય બોલર્સ પર ગંભીર આરોપ લગાવ્‍યા હતા.ઇન્‍ઝમામ ઉલ હકે કહ્યું હતુ કે, ભારતીય ટીમ રિવર્સ સ્‍વિંગ મેળવવા માટે બોલ પર સીરિયસ કામ કરે છે. પાકિસ્‍તાનના ભૂતપૂર્વ કેપ્‍ટન આડકતરી રીતે ભારત પર બોલ ટેમ્‍પરિંગનો આરોપ લગાવી રહ્યા હતા.

ભારતે ટી૨૦ વર્લ્‍ડ કપમાં સોમવારે ઓસ્‍ટ્રેલિયાને ૨૪ રને હરાવીને સેમિફાઇનલમાં એન્‍ટ્રી કરી હતી. ડાબા હાથના ફાસ્‍ટ બોલર અર્શદીપ સિંહે આ મેચમાં ત્રણ વિકેટ લીધી હતી. ઇન્‍ઝમામ ઉલ હકે પાકિસ્‍તાન ટીવી ચેનલ પર અર્શદીપ સિંહ અને ભારતીય ટીમ પર બોલ ટેમ્‍પરિંગનો આરોપ લગાવ્‍યો છે.

ઇન્‍ઝમામ ઉલ હકે કહ્યું, ‘જયારે અર્શદીપ ૧૫મી ઓવર ફેંકી રહ્યો હતો, ત્‍યારે બોલ રિવર્સ સ્‍વિંગ થઈ રહ્યો હતો. નવા બોલ આટલી જલ્‍દી રિવર્સ સ્‍વિંગ નથી થતા. તેનો અર્થ એ છે કે, બોલને ૧૨ મી અને ૧૩ ઓવર સુધીમાં તૈયાર કરી લેવામાં આવ્‍યો હતો. આ બોલ રિવર્સ સ્‍વિંગ માટે તૈયાર હતો. અમ્‍પાયરે પોતાની આંખો ખુલી રાખવી પડશે.'

રોહિત શર્માએ ભારત-ઇંગ્‍લેન્‍ડ સેમિફાઇનલના એક દિવસ પહેલા કરેલી પ્રેસ કોન્‍ફરન્‍સમાં રોહિતને ઇંઝમામ ઉલ હકના આરોપ વિશે પૂછવામાં આવ્‍યું તો તેઓએ પાકિસ્‍તાનના ભૂતપૂર્વ કેપ્‍ટનને પોતાનું મગજ ખુલ્લું રાખવાની સલાહ આપી. રોહિતે કહ્યું, ‘અહીં (વેસ્‍ટઇન્‍ડીઝ)ની વિકેટ ઘણી શુષ્‍ક હોય છે. બધી ટીમોને રિવર્સ સ્‍વિંગ મળી રહી છે. તમારે તમારું મગજ ખુલ્લુ રાખવાની જરૂર છે, આ ઓસ્‍ટ્રેલિયા નથી.'

(2:14 PM IST)