નવી દિલ્હી: ઓસ્ટ્રેલિયા સામે એડિલેડમાં રમાનારી ડે-નાઈટ ટેસ્ટ પહેલા ભારત બે દિવસીય પિંક બોલ વોર્મ-અપ મેચ રમશે. કેનબેરામાં રમાનારી આ વોર્મ-અપ મેચમાં ભારતનો સામનો ઓસ્ટ્રેલિયાની પ્રાઈમ મિનિસ્ટર ઈલેવન સામે થશે, જેનાથી ભારતને ફ્લડલાઈટની નીચે રમવાની પ્રેક્ટિસ મળશે. આ મેચ 30 નવેમ્બરથી 1 ડિસેમ્બર દરમિયાન યોજાશે. પ્રથમ અને બીજી ટેસ્ટ મેચ વચ્ચેના ગેપ દરમિયાન મેચનું આયોજન કરવાની યોજના બનાવવામાં આવી છે.અગાઉની બે સિઝનમાં ઓસ્ટ્રેલિયામાં બે વખત વડાપ્રધાન ઈલેવન સામે પ્રેક્ટિસ મેચનું આયોજન કરવામાં આવ્યું હતું. વેસ્ટ ઈન્ડિઝે 2022માં પ્રાઈમ મિનિસ્ટર ઈલેવન સામે ડે-નાઈટ પ્રેક્ટિસ મેચ રમી હતી, ત્યારબાદ પાકિસ્તાને 2023માં પ્રેક્ટિસ મેચ રમી હતી. જોકે, ભારત જે પ્રેક્ટિસ મેચ રમી રહ્યું છે તેને ચાર દિવસીય મેચને બદલે બે દિવસીય મેચ તરીકે આયોજિત કરવામાં આવશે.2020-21માં ઓસ્ટ્રેલિયાના તેમના અગાઉના પ્રવાસ પર, ભારત એડિલેડમાં ડે-નાઈટ ટેસ્ટમાં આઠ વિકેટે હારી ગયું હતું. તે મેચમાં ભારત બીજા દાવમાં માત્ર 36 રનના સ્કોર પર આઉટ થઈ ગયું હતું. જે ટેસ્ટમાં ભારતનો સૌથી ઓછો સ્કોર હતો. જો કે, તેઓએ તે હારમાંથી પાછા ફરીને શ્રેણી 2-1થી જીતી લીધી.