નવી દિલ્હી: ટીમ ઈન્ડિયાના પૂર્વ દિગ્ગજ ખેલાડી અને પૂર્વ કોચ રાહુલ દ્રવિડનું એક મોટું સપનું આજે પૂરું થયું છે. તેમના પુત્ર સમિત દ્રવિડને ઓસ્ટ્રેલિયા સામેની ODI શ્રેણી અને 4-દિવસીય મેચ માટે ભારતીય અંડર-19 ટીમમાં સામેલ કરવામાં આવ્યો છે. ઓલરાઉન્ડર સમિત દ્રવિડને પ્રથમ વખત ભારતીય અંડર-19 ટીમમાં સ્થાન મળ્યું છે. તે સપ્ટેમ્બર અને ઑક્ટોબરમાં ઑસ્ટ્રેલિયા સામે મલ્ટિ-ફોર્મેટની હોમ સિરીઝ રમતા જોવા મળશે. ઉત્તર પ્રદેશના મિડલ ઓર્ડર બેટ્સમેન મોહમ્મદ અમાનને 50 ઓવરની ટીમનો કેપ્ટન બનાવવામાં આવ્યો છે, જ્યારે મધ્ય પ્રદેશના સોહમ પટવર્ધન ચાર દિવસીય મેચનો કેપ્ટન હશે. રાહુલ દ્રવિડનો પુત્ર સમિત હાલમાં કર્ણાટકની મહારાજા T20 ટ્રોફી મૈસુર વોરિયર્સ ટીમનો ભાગ છે.સમિત દ્રવિડે આ સિઝનમાં 114ના સ્ટ્રાઈક રેટથી 82 રન બનાવ્યા છે, જોકે તેને તેની મધ્યમ ઝડપી બોલિંગ દર્શાવવાની તક મળી નથી. હવે મૈસુર વોરિયર્સે સેમિફાઇનલ મેચ રમવાની છે.ભારતની અંડર-19 ટીમ 21, 23 અને 26 સપ્ટેમ્બરે પુડુચેરીમાં 50 ઓવરની ત્રણ મેચ રમશે. આ પછી ટીમ બે ચાર દિવસીય મેચ માટે ચેન્નાઈ રવાના થશે, જ્યાં 30 સપ્ટેમ્બર અને 7 ઓક્ટોબરે મેચો શરૂ થશે.