તા. ૨૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૧૩ રવિવાર
News of Monday, 2nd September 2024
પેરાલિમ્પિક્સ 2024માં ભારતનો આઠમો મેડલ: યોગેશ કથુનિયાએ ડિસ્કસ થ્રોમાં જીત્યો સિલ્વર
યોગેશ કથુનિયાએ અગાઉ ટોક્યો પેરાલિમ્પિક્સ 2020માં ડિસ્કસ થ્રોમાં પણ સિલ્વર મેડલ જીત્યો હતો:તેણે સતત બીજી પેરાલિમ્પિકમાં મેડલ જીતીને ઈતિહાસ રચ્યો

પેરિસ પેરાલિમ્પિક ગેમ્સ 2024માં ભારતીય ખેલાડીઓનું જોરદાર પ્રદર્શન ચાલુ છે. શૂટિંગ અને બેડમિન્ટન બાદ હવે એથ્લેટિક્સમાં પણ મેડલ આવી રહ્યા છે અને આ ક્રમમાં ભારતના યોગેશ કથુનિયાએ પુરુષોની ડિસ્કસ થ્રો F-56 કેટેગરીમાં સિલ્વર મેડલ જીત્યો છે. આ સાથે ભારતે પેરિસ પેરાલિમ્પિક્સનો આઠમો મેડલ જીત્યો છે. એટલું જ નહીં યોગેશે સતત બીજી પેરાલિમ્પિક ગેમ્સમાં સિલ્વર મેડલ જીત્યો છે.
ભારતે આ મેડલ પેરિસના સ્ટેડ ડી ફ્રાન્સમાં આયોજિત પેરાલિમ્પિક્સની એથ્લેટિક્સ ઈવેન્ટમાં જીત્યો હતો. યોગેશે સોમવાર, 2 સપ્ટેમ્બરના રોજ યોજાયેલી F-56 કેટેગરીની ડિસ્કસ થ્રો ઈવેન્ટમાં 44.22 મીટરના થ્રો સાથે મેડલ જીત્યો હતો. ખાસ વાત એ છે કે યોગેશે આ થ્રો તેના પહેલા જ પ્રયાસમાં કર્યો હતો, જે તેને મેડલ જીતવા માટે પૂરતો હતો.
યોગેશે સતત બીજી પેરાલિમ્પિક ગેમ્સમાં સિલ્વર મેડલ જીત્યો છે. આ પહેલા તેણે ટોક્યો ગેમ્સમાં પણ આ જ મેડલ જીત્યો હતો. આ સિઝનમાં યોગેશનો પણ આ સર્વશ્રેષ્ઠ થ્રો હતો. જોકે તેણે ટોક્યોમાં આનાથી વધુ ફેંક્યા હતા. ત્યારબાદ તેણે 44.38 મીટર સાથે સિલ્વર મેડલ જીત્યો હતો.
ભારતને પેરાલિમ્પિક્સ 2024માં એથ્લેટિક્સમાં આ ચોથો મેડલ મળ્યો છે. તેની પહેલા, પ્રીતિ પાલે તેની 100 મીટર અને 200 મીટરની કેટેગરીમાં બ્રોન્ઝ મેડલ જીત્યો હતો. નિષાદ કુમારે મેન્સ હાઈ જમ્પમાં સિલ્વર મેડલ જીત્યો હતો. નિષાદે સતત બીજી પેરાલિમ્પિક્સમાં પણ સિલ્વર જીત્યો હતો. હવે યોગેશે પણ પોતાની સફળતાનું પુનરાવર્તન કર્યું છે.
હરિયાણાના બહાદુરગઢની રહેવાસી કથુનિયા 9 વર્ષની ઉંમરે ગુઈલેન-બાર સિન્ડ્રોમનો શિકાર બન્યો હતો, જેના કારણે તે લકવાગ્રસ્ત થઈ ગયો હતો. પછી તેની માતા મીના દેવીએ પોતે ફિઝિયોથેરાપીની તાલીમ લીધી અને આગામી 3-4 વર્ષમાં તેના પુત્રને અમુક અંશે સક્ષમ બનાવ્યો, જેનાથી તેના સ્નાયુઓને થોડી શક્તિ મળી
. દિલ્હીની પ્રખ્યાત કિરોરી માલ કોલેજમાંથી બી. કોમ કરતી વખતે, તેને પેરા-એથ્લેટિક્સમાં ભાગ લેવા માટે પ્રોત્સાહિત કરવામાં આવ્યો અને 2017માં, તેણે ડિસ્કસ થ્રોની તાલીમ શરૂ કરી અને ત્યારથી તે આ રમતમાં ભારત માટે સતત મેડલ જીતી રહ્યો છે.
(6:22 PM IST)









છેલ્લા 8 દિવસમાં સૌથી લોકપ્રિય 
