મુંબઈ :ભારતીય ક્રિકેટ ટીમના પૂર્વ દિગ્ગજ બેટ્સમેન, કેપ્ટન અને કોચ રાહુલ દ્રવિડ ફરી એકવાર ઈન્ડિયન પ્રીમિયર લીગમાં પરત ફર્યા છે. ટીમ ઈન્ડિયાને T20 વર્લ્ડ ચેમ્પિયન બનાવ્યા બાદ હવે રાહુલ દ્રવિડને IPL ફ્રેન્ચાઈઝી રાજસ્થાન રોયલ્સ દ્વારા તેના મુખ્ય કોચ તરીકે નિયુક્ત કરવામાં આવ્યો છે. 

છેલ્લા ઘણા દિવસોથી આ અંગે હોબાળો મચ્યો હતો અને હવે ફ્રેન્ચાઈઝીએ જ આ રહસ્ય ખોલ્યું છે. શુક્રવારે, 6 સપ્ટેમ્બરના રોજ, રાજસ્થાને સોશિયલ મીડિયા પોસ્ટ દ્વારા ટીમના નવા મુખ્ય કોચ તરીકે દ્રવિડની નિમણૂકની સત્તાવાર જાહેરાત કરી. રાહુલ દ્રવિડ આ પહેલા પણ રાજસ્થાન સાથે સંકળાયેલો હતો અને 2014-2015માં સતત બે સીઝન માટે ટીમનો મેન્ટર હતો.

  રાજસ્થાન રોયલ્સના CEO જેક લુશ મેકક્રમે ટીમની IPL જર્સી સોંપીને રાહુલ દ્રવિડનું ફ્રેન્ચાઈઝીમાં ગત કર્યું. દ્રવિડે એમ પણ કહ્યું કે વર્લ્ડ કપ પછી કોચિંગમાં પરત ફરવાનો આ શ્રેષ્ઠ રસ્તો હતો. તેણે કહ્યું કે વર્લ્ડ કપ પછી, નવો પડકાર શરૂ કરવાનો આ આદર્શ સમય છે અને તેના માટે રાજસ્થાન રોયલ્સ બેસ્ટ ટીમ છે. ફ્રેન્ચાઈઝીએ એક નિવેદનમાં કહ્યું કે દ્રવિડે આગામી કેટલાક વર્ષો માટે આ ડીલ પર હસ્તાક્ષર કર્યા છે  

રાહુલ દ્રવિડ 2021માં ટીમ ઈન્ડિયાના મુખ્ય કોચ બન્યા અને અઢી વર્ષ સુધી આ પદ સંભાળ્યું, જ્યાં 29 જૂને બાર્બાડોસમાં તેણે ટીમ ઈન્ડિયાને T20 વર્લ્ડ ચેમ્પિયન બનાવ્યું. આ સાથે જ દ્રવિડે ટીમ ઈન્ડિયા સાથેની સફર પૂરી કરી. ત્યારથી દ્રવિડનું નામ IPLની અલગ-અલગ ફ્રેન્ચાઈઝી સાથે જોડાઈ રહ્યું હતું. આખરે દ્રવિડ તેની જૂની ફ્રેન્ચાઈઝીમાં પાછો ફર્યો, જ્યાં તે 2011 થી 2013 સુધી કેપ્ટન હતો અને પછી બે વર્ષ સુધી મેન્ટર રહ્યો.