<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Monday, 9th September 2024

શ્રીલંકાએ 10 વર્ષ પછી ઇંગ્લેન્ડમાં ટેસ્ટ મેચ જીતી : સતત સાત હાર બાદ બ્રિટિશ સામે પ્રથમ વિજય .

શ્રીલંકાએ ઈંગ્લેન્ડને આઠ વિકેટે હરાવ્યું :પથુમ નિસાન્કાએ 127 રનની અણનમ ઇનિંગ રમી: 2014 બાદ શ્રીલંકાની ઈંગ્લેન્ડમાં પ્રથમ જીત છે , સતત સાત હાર બાદ બ્રિટિશ સામે પ્રથમ જીત.

લંડનઃ પથુમ નિસાન્કાની શાનદાર અણનમ સદીની મદદથી શ્રીલંકાએ સોમવારે ઓવલ ટેસ્ટમાં ઈંગ્લેન્ડને સાત વિકેટે હરાવ્યું હતું. આ રીતે ઈંગ્લેન્ડ ટેસ્ટ શ્રેણી 2-1થી જીતવામાં સફળ રહ્યું અને શ્રીલંકાએ છેલ્લી મેચ જીતીને પોતાનું સન્માન બચાવ્યું. ઇંગ્લેન્ડે શ્રીલંકાને 219 રનનો ટાર્ગેટ આપ્યો હતો, જેને લંકન લાયન્સે ચોથા દિવસે લંચ પહેલા બે વિકેટના નુકસાને હાંસલ કરી લીધો હતો.

  ઓપનર નિસાન્કાએ 127 રનની અણનમ ઇનિંગ રમી હતી. તેણે અનુભવી એન્જેલો મેથ્યુઝ (અણનમ 32) સાથે 111 રનની અતૂટ મેચ વિનિંગ ભાગીદારી કરી હતી. આ જીત સાથે શ્રીલંકાની ઈંગ્લેન્ડ સામે સતત સાત હારનો સિલસિલો પણ સમાપ્ત થઈ ગયો. 2014 પછી ઇંગ્લિશ ધરતી પર શ્રીલંકાની આ પ્રથમ જીત છે.

   શ્રીલંકાએ આ પહેલા 1998, 2006 અને 2014માં ઈંગ્લેન્ડની ધરતી પર જીતનો સ્વાદ ચાખ્યો છે. ઇંગ્લિશ ધરતી પર શ્રીલંકાની આ માત્ર ચોથી જીત છે. ઈંગ્લેન્ડે શ્રેણી 2-1થી જીતી હતી, પરંતુ જુલાઈમાં વેસ્ટ ઈન્ડિઝને 3-0થી હરાવતા સતત બીજી શ્રેણીમાં ક્લીન સ્વીપ કરવામાં ચૂકી ગઈ હતી. શ્રીલંકાએ ઓવલ મેદાનમાં એક વિકેટે 94 રનથી દિવસની શરૂઆત કરી હતી અને તેને જીતવા માટે બીજા 125 રનની જરૂર હતી. ટીમે દિવસના પ્રથમ સેશનમાં જ આક્રમક બેટિંગ કરીને આ સિદ્ધિ મેળવી હતી. 

    પોપ અને ડકેટ સિવાય, ઈંગ્લેન્ડનો કોઈપણ બેટ્સમેન તેની પ્રથમ ઈનિંગમાં 20 રનનો આંકડો પાર કરી શક્યો ન હતો, જેના કારણે સારી પીચને ધ્યાનમાં લઈને કુલ 325 રન ખૂબ જ સાધારણ લાગે છે. આ હોવા છતાં, શ્રીલંકા લીડ લઈ શક્યું ન હતું કારણ કે તેનો દાવ ફક્ત 263 રનમાં જ સમેટાઈ ગયો હતો. ધનંજય ડી સિલ્વા, કુસલ મેન્ડિસ અને પથુમ નિસાન્કાએ ફિફ્ટી વટાવી હોવા છતાં અન્ય કોઈ બેટ્સમેન મોટો સ્કોર નોંધાવી શક્યો નહોતો. આવી સ્થિતિમાં શ્રીલંકા 62 રનથી પાછળ રહી ગયું હતું. 

  રવિવારે, શ્રીલંકા સામેની મેચના ત્રીજા દિવસે, ઇંગ્લેન્ડની બીજી ઇનિંગને 34 ઓવરમાં 156 રનમાં સમેટીને વિજયનો પાયો નાખ્યો હતો. ટીમે જીતવા માટે 219 રનનો ટાર્ગેટ 40.3 ઓવરમાં મેળવી લીધો હતો. 124 બોલની ઈનિંગમાં 13 ચોગ્ગા અને બે છગ્ગા ફટકારનાર નિસાન્કાએ 107 બોલમાં સદી પૂરી કર્યા બાદ હાથ ઊંચા કરીને ઉજવણી કરી હતી. પછી તેણે તેના બેટને ચુંબન કર્યું અને આકાશ તરફ જોવા લાગ્યો. ટેસ્ટમાં આ તેની બીજી સદી છે. અગાઉ 2021માં તેણે વેસ્ટ ઈન્ડિઝ સામે સદી ફટકારી હતી.

(9:56 PM IST)