નવી દિલ્હી :  ભારતીય ટીમનો સ્ટાર ઓલરાઉન્ડર રવિન્દ્ર જાડેજા ટેસ્ટ ક્રિકેટમાં દિવસેને દિવસે નવી ઊંચાઈઓ સર કરી રહ્યો છે. તેણે બાંગ્લાદેશ સામે ચાલી રહેલી બે મેચની ટેસ્ટ શ્રેણીમાં એક મોટો રેકોર્ડ પોતાના નામે કર્યો છે. ટેસ્ટ ક્રિકેટના ઈતિહાસમાં આવું કરનાર તે પ્રથમ ખેલાડી બની ગયો છે.

ચેન્નાઈમાં રમાયેલી પ્રથમ ટેસ્ટ મેચમાં ભારતે બાંગ્લાદેશને 280 રનથી હરાવ્યું હતું. આ દરમિયાન જાડેજાએ પ્રથમ દાવમાં બે અને બીજી ઈનિંગમાં ત્રણ વિકેટ ઝડપી હતી. હવે તેના નામે એક એવો રેકોર્ડ નોંધાઈ ગયો છે જે 147 વર્ષના ઈતિહાસમાં કોઈ કરી શક્યું નથી. ભારતીય દિગ્ગજ ટેસ્ટ મેચ જીતમાં 2000થી વધુ રન બનાવનાર અને 200થી વધુ વિકેટ લેનાર પ્રથમ ખેલાડી બન્યો. જાડેજા બાદ અશ્વિન પણ આ સિદ્ધિ મેળવી શકે છે. તેણે ટેસ્ટ ક્રિકેટમાં 1943 રન બનાવ્યા અને 369 વિકેટ લીધી છે.
કાનપુરમાં મોટા રેકોર્ડ પર જાડેજાની નજર
35 વર્ષીય ઓલરાઉન્ડર કાનપુર ટેસ્ટમાં એક મોટા રેકોર્ડ પર નજર રહેશે. એક વિકેટ લેતાની સાથે જ તે ટેસ્ટ ક્રિકેટમાં 300 વિકેટ પૂરી કરી લેશે. આ સાથે તે કપિલ દેવ, અનિલ કુંબલે, હરભજન સિંહ, ઝહીર ખાન, રવિચંદ્રન અશ્વિન અને ઈશાંત શર્મા પછી આવું કરનાર સાતમો બોલર બની જશે.
35 વર્ષીય ઓલરાઉન્ડરની નજર વધુ એક રેકોર્ડ પર છે. આગામી મેચમાં એક વિકેટ લઈને તે પોતાના નામે માત્ર 300 ટેસ્ટ વિકેટ તો નોંધાવશે જ, આ ઉપરાંત તે આ ફોર્મેટમાં 300 વિકેટ અને 3000 રન પૂરા કરનાર 11મો ખેલાડી બની જશે. આ સાથે જ તે આવું કરનાર ભારતનો ત્રીજો ખેલાડી બનશે. જાડેજા પહેલા ભારતીય ટીમના પૂર્વ કેપ્ટન કપિલ દેવ (434 વિકેટ અને 5248 રન) અને અનુભવી ઓફ સ્પિનર રવિચંદ્રન અશ્વિન (522 વિકેટ અને 3422 રન) આ સિદ્ધિ મેળવી ચૂક્યા છે.
કાનપુરમાં હજુ તક મળી નથી
ભારતની T20 વર્લ્ડ કપ વિજેતા ટીમનો હિસ્સો રહેલા જાડેજાને હજુ સુધી કાનપુર ટેસ્ટમાં બોલિંગ કરવાની તક મળી નથી. ભારતે આ મેચમાં ટોસ જીતીને બાંગ્લાદેશને બેટિંગ માટે આમંત્રણ આપ્યું હતું. વરસાદથી પ્રભાવિત પ્રથમ દિવસની રમતમાં કેપ્ટને બુમરાહ, સિરાજ, અશ્વિન અને આકાશ દીપને બોલિંગ કરવાની તક આપી હતી. જોકે જાડેજાએ અત્યાર સુધી એક પણ ઓવર ફેંકી નથી. કાનપુરમાં વરસાદને કારણે બીજા દિવસની રમત એક પણ બોલ ફેંકાયા વિના રદ કરવામાં આવી હતી. હાલમાં મહેમાન ટીમનો સ્કોર 107/3 છે. ક્રીઝ પર હાલ મોમિનુલ હક (40) અને મુશફિકુર રહીમ (6) રમી રહ્યાં છે.