નવી દિલ્હી: મધ્યમ ઝડપી બોલર અરુંધતી રેડ્ડી (19 રનમાં 3 વિકેટ)ના નેતૃત્વમાં બોલરોના શાનદાર પ્રદર્શન અને શેફાલી વર્મા (32) અને કેપ્ટન હરમનપ્રીત કૌર (29 રિટાયર્ડ હર્ટ)ની ઉપયોગી ઇનિંગ્સને કારણે ભારતે મહિલા T20 વર્લ્ડ કપમાં કટ્ટર હરીફ પાકિસ્તાનને હરાવ્યું હતું. રવિવારે ગ્રૂપ A ની તેમની બીજી મેચમાં, તેઓએ છ વિકેટથી હરાવીને તેમની પ્રથમ જીત નોંધાવી હતી.ભારતે પાકિસ્તાનને 20 ઓવરમાં આઠ વિકેટે 105 રનના સાધારણ સ્કોર પર રોક્યા બાદ 18.5 ઓવરમાં ચાર વિકેટે 108 રન બનાવીને પોતાની સેમિફાઇનલની આશા જીવંત રાખી હતી.ભારતને આ ટૂર્નામેન્ટમાં પ્રથમ જીત મળી છે પરંતુ શું ભારતીય ટીમ વધુ ઝડપે લક્ષ્યનો પીછો કરી શકી હોત, કારણ કે ભારતીય ટીમનો નેટ રન રેટ નકારાત્મક છે અને તેની આગામી બે મેચો શ્રીલંકા અને ઓસ્ટ્રેલિયા સામે છે. જો ભારતે આ લક્ષ્યાંક 11.2 ઓવરમાં હાંસલ કરી લીધો હોત તો ભારતનો નેટ રન રેટ સકારાત્મક રહી શક્યો હોત.પાકિસ્તાનની ઇનિંગ્સમાં ત્રણ વિકેટ લેનારી અરુંધતી રેડ્ડીને પ્લેયર ઓફ ધ મેચનો એવોર્ડ મળ્યો હતો. લક્ષ્યનો પીછો કરતી વખતે ભારતે ફરી એકવાર ઓપનર સ્મૃતિ મંધાનાને સસ્તામાં ગુમાવી દીધી હતી. મંધાના સાત રન બનાવીને ટીમના 18 રનના સ્કોર પર આઉટ થઈ ગઈ હતી.ત્યાર બાદ શેફાલીએ જેમિમાહ રોડ્રિગ્સ સાથે બીજી વિકેટ માટે 43 રનની મહત્ત્વપૂર્ણ ભાગીદારી કરીને ભારતને જીતના માર્ગે આગળ ધપાવ્યું હતું. શેફાલી 35 બોલમાં ત્રણ ચોગ્ગાની મદદથી 32 રન બનાવીને આઉટ થઈ ગઈ હતી. ઈનિંગની 16મી ઓવરમાં ફાતિમા સનાએ ભારતને બે બોલમાં બે વિકેટ અપાવી મેચમાં રોમાંચ લાવ્યો હતો. ફાતિમાએ જેમિમા અને રિચા ઘોષને આઉટ કરીને ભારતનો સ્કોર ચાર વિકેટે 80 રન સુધી ઘટાડી દીધો હતો. જેમિમાહે 28 બોલમાં 23 રન બનાવ્યા હતા.