મુંબઈ :માર્કો જાન્સેન અને કાગિસો રબાડાની ભાગીદારીના કારણે દક્ષિણ આફ્રિકાએ પ્રથમ ટેસ્ટમાં પાકિસ્તાનને 2 વિકેટે હરાવ્યું હતું. આ જીત સાથે દક્ષિણ આફ્રિકાએ પણ વર્લ્ડ ટેસ્ટ ચેમ્પિયનશિપની ફાઇનલમાં પ્રવેશ મેળવી લીધો છે. શ્રેણીની બીજી ટેસ્ટ મેચ 3 જાન્યુઆરી 2025થી રમાશે.
પ્રથમ ટેસ્ટમાં પાકિસ્તાનની ટીમ પ્રથમ દાવમાં 211 રન બનાવી શકી હતી. જવાબમાં દક્ષિણ આફ્રિકાએ પ્રથમ દાવમાં 301 રન બનાવ્યા હતા. પાકિસ્તાને બીજા દાવમાં 237 રન બનાવ્યા હતા. આવી સ્થિતિમાં દક્ષિણ આફ્રિકાએ બીજા દાવમાં 8 વિકેટના નુકસાન પર 150 રન બનાવીને મેચ જીતી લીધી હતી.

પાકિસ્તાન તરફથી પ્રથમ દાવમાં કામરાન ગુલામે અડધી સદી ફટકારી હતી.તેણે 71 બોલમાં 54 રનની ઇનિંગ રમી હતી.તેમના સિવાય આમેર જમાલે 28 રન, મોહમ્મદ રિઝવાને 27 રન અને કેપ્ટન શાન મસૂદે 17 રન બનાવ્યા હતા.દક્ષિણ આફ્રિકા તરફથી ડેન પેટરસને 5 અને કોર્બિન બોશે 4 વિકેટ લીધી હતી.

જવાબમાં સાઉથ આફ્રિકા માટે એડન માર્કરામે પ્રથમ દાવમાં ફિફ્ટી ફટકારી હતી. તેણે 144 બોલમાં 89 રનની ઇનિંગ રમી હતી. તેના સિવાય કોર્બિન બોશ 81 રન બનાવીને અણનમ રહ્યો હતો. કેપ્ટન ટેમ્બા બાવુમાએ 31 રન અને ડેવિડ બેડિંગહામે 30 રન બનાવ્યા હતા. પાકિસ્તાન તરફથી ખુર્રમ શહજાદ અને નસીમ શાહને 3-3 વિકેટ મળી હતી. આ સિવાય આમેર જમાલને તેની કિટીમાં બે સફળતા મળી હતી.

પાકિસ્તાનની બીજી ઈનિંગમાં બાબર આઝમ અને સઈદ શકીલે અર્ધસદી ફટકારી હતી.બાબરે 85 બોલમાં 50 રન અને શકીલે 113 બોલમાં 84 રન બનાવ્યા હતા.તેમના સિવાય શાન મસૂદે 28 રન અને સૈમ અય્યુબે 27 રન બનાવ્યા હતા.માર્કો જાનસેને સૌથી વધુ 6 વિકેટ લીધી હતી.તેના સિવાય કાગિસો રબાડાએ 2 વિકેટ લીધી હતી.

દક્ષિણ આફ્રિકાને બીજી ઇનિંગમાં જીતવા માટે 148 રનની જરૂર હતી. ટીમની શરૂઆત ખરાબ રહી હતી. 19 રનની અંદર 3 ખેલાડી પેવેલિયન પરત ફર્યા હતા. ટોની ડી જોરઝીએ 2 રન બનાવ્યા હતા. રયાન રિકેલટનનું ખાતું પણ ખોલી શક્યો ન હતો. આ ઉપરાંત ટ્રિસ્ટન સ્ટબ્સે 1 રન બનાવ્યો હતો. એડન માર્કરામે 37 રનની ઇનિંગ રમી હતી. કેપ્ટન ટેમ્બા બાવુમાએ 78 બોલમાં 40 રન બનાવ્યા હતા.

કાયલ વેરીન 31મી ઓવરમાં પેવેલિયન પરત ફર્યો હતો. તેણે 6 બોલમાં 2 રન બનાવ્યા હતા. ડેવિડ બેડિંગહામે 14 બોલમાં 14 રનની ઇનિંગ રમી હતી. કોર્બિન બોશ ગોલ્ડન ડક પર પેવેલિયન પરત ફર્યો. આ પછી માર્કો યાનસેનના અણનમ 16 રન અને રબાડાના અણનમ 31 રનની મદદથી દક્ષિણ આફ્રિકાને જીત અપાવી હતી. પાકિસ્તાન તરફથી મોહમ્મદ અબ્બાસે 6 વિકેટ લીધી હતી.