દક્ષિણ આફ્રિકાએ બીજી ટેસ્ટ મેચમાં પાકિસ્તાની ટીમને 10 વિકેટથી હરાવ્યું અને આ સાથે આફ્રિકન ટીમે શ્રેણી પણ 2-0થી જીતી લીધી. આફ્રિકન ટીમ પહેલા જ વર્લ્ડ ટેસ્ટ ચેમ્પિયનશિપની ફાઈનલ માટે ક્વોલિફાઈ કરી ચૂકી છે. આ મેચમાં પાકિસ્તાને આફ્રિકાને જીતવા માટે 58 રનનો ટાર્ગેટ આપ્યો હતો, જેનો આફ્રિકાએ ખૂબ જ સરળતાથી પીછો કર્યો હતો.

આ જીત સાથે દક્ષિણ આફ્રિકાના કેપ્ટન ટેમ્બા બાવુમાએ એક પણ ટેસ્ટ ન હારવાનો પોતાનો રેકોર્ડ જાળવી રાખ્યો છે. અત્યાર સુધી બાવુમાએ 9 ટેસ્ટ મેચોમાં આફ્રિકન ટીમની કેપ્ટનશીપ કરી છે, જેમાં ટીમે 8 જીતી છે અને એક ડ્રો કરી છે. તેણે પોતાનો વિજય રથ જાળવી રાખ્યો છે. હવે તેનું આગામી પગલું ડબલ્યુટીસી ફાઈનલ જીતવાનું રહેશે. દક્ષિણ આફ્રિકાએ છેલ્લી 7 ટેસ્ટ મેચોમાં સતત જીત મેળવી છે.

દક્ષિણ આફ્રિકાની ટેસ્ટ મેચોમાં સતત સૌથી વધુ જીત

માર્ચ 2002 થી ઓગસ્ટ 2003 - 9 મેચો

ઓગસ્ટ 2024 થી અત્યાર સુધી – 7 મેચ

નવેમ્બર 2012 થી ફેબ્રુઆરી 2013 – 6 મેચ

પ્રથમ  બેટિંગ કરતા દક્ષિણ આફ્રિકાએ પહાડ જેવો સ્કોર 615 રન બનાવ્યો હતો. ટીમ તરફથી રેયાન રિકલ્ટન, ટેમ્બા બાવુમા અને કાયલ વોરેને સદી ફટકારી હતી. રિકલ્ટને બેવડી સદી ફટકારી અને 259 રનની ઇનિંગ રમી. પાકિસ્તાન તરફથી મોહમ્મદ અબ્બાસ અને સલમાન અલી આગાએ 3-3 વિકેટ લીધી હતી. પરંતુ આ બે સિવાય અન્ય બોલરો કંગાળ ફ્લોપ સાબિત થયા.

બોલરોના ખરાબ પ્રદર્શન બાદ બેટ્સમેન પણ પાકિસ્તાન માટે પ્રથમ દાવમાં પોતાની તાકાત બતાવી શક્યા ન હતા. માત્ર બાબર આઝમે અડધી સદી ફટકારી હતી અને 58 રન બનાવ્યા હતા. પાકિસ્તાની ટીમ પ્રથમ દાવમાં 184 રન બનાવી શકી હતી. આ પછી પાકિસ્તાનને ફોલોઓન રમવાની ફરજ પડી હતી. કારણ કે આફ્રિકાને 421 રનની લીડ મળી હતી.

પરંતુ બીજામાં પાકિસ્તાની બેટ્સમેનોએ શાનદાર પ્રદર્શન કર્યું અને 478 રન બનાવ્યા. શાન મસૂદે સદી ફટકારીને ટીમને 145 રન બનાવ્યા હતા. તેણે બાબર આઝમ (81 રન) સાથે ઓપનિંગ કરતા 205 રનની ભાગીદારી કરી હતી. સલમાન અલી આગાએ 48 રન બનાવ્યા હતા. મોહમ્મદ રિઝવાને 41 રનનું યોગદાન આપ્યું હતું. આ ખેલાડીઓના કારણે જ પાકિસ્તાની ટીમ ઇનિંગ્સની હાર ટાળવામાં સફળ રહી હતી અને દક્ષિણ આફ્રિકાને 58 રનનો ટાર્ગેટ આપવામાં સફળ રહી હતી. પરંતુ આફ્રિકાએ આ લક્ષ્યનો આસાનીથી પીછો કર્યો હતો અને જીત મેળવી હતી