ભારત અને ઇંગ્લેન્ડ વચ્ચેની પહેલી વનડે મેચ નાગપુરમાં રમાઈ રહી છે. આ મેચમાં ઇંગ્લેન્ડે ટોસ જીતીને પહેલા બેટિંગ કરવાનો નિર્ણય લીધો હતો. પ્રથમ બેટિંગ કરતા ઇંગ્લેન્ડની ટીમ ફક્ત 248 રન જ બનાવી શકી. બીજી તરફ, ભારતીય ટીમ તરફથી રવિન્દ્ર જાડેજાની વિસ્ફોટક બોલિંગ જોવા મળી. ૩ વિકેટ લીધા બાદ, જાડેજાએ આંતરરાષ્ટ્રીય ક્રિકેટમાં એક ખાસ સિદ્ધિ નોંધાવી છે.

નાગપુર વનડેમાં રવિન્દ્ર જાડેજાએ 9 ઓવરમાં માત્ર 26 રન આપીને 3 વિકેટ લીધી હતી. આ દરમિયાન તેણે જો રૂટ, જેકબ બેથેલ અને આદિલ રાશિદને પેવેલિયન મોકલ્યા. ૩ વિકેટ લઈને જાડેજાએ પોતાની ૬૦૦ આંતરરાષ્ટ્રીય વિકેટ પણ પૂર્ણ કરી લીધી છે. જાડેજા હવે 600 કે તેથી વધુ વિકેટ લેનાર છઠ્ઠો ભારતીય બોલર બની ગયો છે.
આ મેચમાં ઇંગ્લેન્ડના સ્ટાર બેટ્સમેન જો રૂટ પણ લાંબા સમય પછી ODI ટીમમાં પરત ફર્યા હતા, પરંતુ રૂટ આ મેચમાં કંઈ ખાસ કરી શક્યો ન હતો. આ મેચમાં, જો રૂટ 31 બોલમાં માત્ર 19 રન બનાવીને આઉટ થયો હતો. જાડેજાએ ODI ક્રિકેટમાં 12મી વખત જો રૂટને આઉટ કર્યો છે. આ ઉપરાંત, જાડેજાએ ODI ક્રિકેટમાં ઓસ્ટ્રેલિયાના સ્ટીવ સ્મિથને 11 વખત આઉટ કર્યો છે.

આ મેચમાં પ્રથમ બેટિંગ કરતી ઇંગ્લેન્ડની ટીમ 47.4 ઓવરમાં 248 રનમાં ઓલઆઉટ થઈ ગઈ હતી. ઇંગ્લેન્ડ તરફથી બેટિંગ કરતા કેપ્ટન જોસ બટલરે સૌથી વધુ 52 રન બનાવ્યા. આ ઉપરાંત જેકબ બેથેલે 51 રન બનાવ્યા. ટીમ ઈન્ડિયા તરફથી બોલિંગ કરતી વખતે હર્ષિત રાણા અને રવિન્દ્ર જાડેજાએ 3-3 વિકેટ લીધી.