ટીમ ઈન્ડિયા ચેમ્પિયન્સ ટ્રોફી 2025 ના ગ્રુપ સ્ટેજમાં પાકિસ્તાન સામે પોતાની બીજી મેચ રમી રહી છે. બંને ટીમો વચ્ચેની આ મેચ દુબઈ ઈન્ટરનેશનલ ક્રિકેટ સ્ટેડિયમમાં રમાઈ રહી છે. આ મેચ દરમિયાન, ટીમ ઈન્ડિયાના સ્ટાર બેટ્સમેન વિરાટ કોહલીએ ODI ક્રિકેટમાં ઈતિહાસ રચ્યો છે. વિરાટે એક ખાસ યાદીમાં દુનિયાના તમામ બેટ્સમેનોને પાછળ છોડી દીધા છે

પાકિસ્તાન સામેની આ મેચમાં 15 રન બનાવીને વિરાટ કોહલીએ વનડે ક્રિકેટમાં પોતાના 14000 રન પૂરા કર્યા. તમને જણાવી દઈએ કે, વિરાટ વિશ્વનો ફક્ત ત્રીજો બેટ્સમેન છે જેણે ODI માં 14 હજાર રનનો આંકડો સ્પર્શ્યો છે. વિરાટ પહેલા કુમાર સંગાકારા 14234 રન સાથે બીજા સ્થાને છે અને સચિન 18426 રન સાથે પ્રથમ સ્થાને છે.

વિરાટ પહેલા સચિન તેંડુલકર અને શ્રીલંકાના કુમાર સંગાકારા આ સિદ્ધિ મેળવી ચૂક્યા છે. પરંતુ વિરાટ કોહલીએ વનડેમાં સૌથી ઝડપી 14000 રન પૂરા કર્યા છે. સચિન તેંડુલકરે 359મી મેચની 350મી ઈનિંગમાં આ સિદ્ધિ મેળવી હતી. જ્યારે, વિરાટ કોહલીએ 299મી મેચની 287મી ઈનિંગમાં આ કારનામું કર્યું છે.

વિરાટ કોહલી પહેલા સચિન તેંડુલકરે પણ પાકિસ્તાન સામે રમાયેલી મેચ દરમિયાન વનડેમાં પોતાના 14000 રન પૂરા કર્યા હતા. સચિને 6 ફેબ્રુઆરી 2006ના રોજ પેશાવરમાં આ સિદ્ધિ મેળવી હતી. હવે, વિરાટ કોહલીએ દુબઈમાં પાકિસ્તાન સામે આ સિદ્ધિનું પુનરાવર્તન કર્યું છે.

વિરાટ કોહલી ODI ફોર્મેટના સૌથી સફળ બેટ્સમેનોમાંનો એક છે. તેણે આ ફોર્મેટમાં ઘણી મોટી સિદ્ધિઓ હાંસલ કરી છે. વનડેમાં સૌથી વધુ સદી ફટકારવાનો રેકોર્ડ પણ વિરાટના નામે છે. તેણે આ ફોર્મેટમાં અત્યાર સુધીમાં 50 સદી ફટકારી છે. આ યાદીમાં પણ તેણે સચિન તેંડુલકરને પાછળ છોડ્યા હતા. સચિન તેંડુલકરે પોતાની વનડે કારકિર્દી દરમિયાન 49 સદી ફટકારી હતી