ભારતીય ક્રિકેટ કંટ્રોલ બોર્ડ (BCCI)ને મોટો ઝટકો લાગ્યો છે. સ્પોર્ટ્સ સાયન્સ વિંગના વડા નીતિન પટેલ આ મહિનાના અંત સુધીમાં તેમના પદ પરથી રાજીનામું આપશે. પટેલ અગાઉ ભારતીય ટીમ અને મુંબઈ ઈન્ડિયન્સના ફિઝિયો રહી ચૂક્યા છે. હવે બીસીસીઆઈ ટૂંક સમયમાં તેમના સ્થાને નવા ફિઝિયોની શોધ કરશે.

  ક્રિકબઝના અહેવાલ મુજબ, નીતિન પટેલ હાલમાં તેમનો નોટિસ પિરિયડ પૂરો કરી રહ્યા છે. તેમનો ત્રણ વર્ષનો કાર્યકાળ એપ્રિલ 2022માં શરૂ થયો હતો જે હવે પૂરો થવા જઈ રહ્યો છે. તેમના કાર્યકાળ દરમિયાન, પટેલ ઘણી મહત્વપૂર્ણ જવાબદારીઓ સંભાળતા હતા, જેમાં આંતરરાષ્ટ્રીય ક્રિકેટના મોટા ખેલાડીઓના પુનર્વસન અને વર્કલોડ મેનેજમેન્ટનો સમાવેશ થાય છે. તેણે જસપ્રિત બુમરાહ, શ્રેયસ અય્યર, કેએલ રાહુલ અને અન્ય ઘણા ખેલાડીઓના પુનર્વસનમાં મહત્વની ભૂમિકા ભજવી હતી.

  તેણે મોહમ્મદ શમીના એક વર્ષ કરતાં વધુ સમય બાદ આંતરરાષ્ટ્રીય ક્રિકેટમાં પુનરાગમન કરવામાં મહત્ત્વની ભૂમિકા ભજવી હતી. તેની વાપસી બાદ, શમીએ ચેમ્પિયન્સ ટ્રોફી 2025માં ભારતની જીતમાં મહત્વપૂર્ણ યોગદાન આપ્યું હતું. રિપોર્ટમાં એવો પણ દાવો કરવામાં આવ્યો છે કે નીતિન પટેલ હાલમાં જસપ્રિત બુમરાહના રિહેબનું ધ્યાન રાખી રહ્યા છે. બુમરાહ બોર્ડર-ગાવસ્કર ટ્રોફી દરમિયાન ઈજાગ્રસ્ત થયો હતો અને ત્યારથી તે મેદાનની બહાર છે.

  તેમની દેખરેખ હેઠળ, શ્રેયસ અય્યર અને જસપ્રિત બુમરાહની પુનઃપ્રાપ્તિ 2023 ODI વર્લ્ડ કપ પહેલા સફળ રહી હતી. આ ટુર્નામેન્ટમાં ભારત અપરાજિત રહ્યું અને ફાઇનલમાં પહોંચ્યું. શ્રેયસ અય્યરે 530 રન બનાવ્યા હતા, જ્યારે જસપ્રિત બુમરાહે 20 વિકેટ લઈને ભારતની સફળતામાં મહત્વની ભૂમિકા ભજવી હતી

  પટેલના રાજીનામાનું કારણ હજુ સ્પષ્ટ થયું નથી, પરંતુ અહેવાલો અનુસાર, તેમણે તેમના કાગળો સબમિટ કરી દીધા છે. જસપ્રિત બુમરાહ હજુ પુનર્વસન પ્રક્રિયામાંથી પસાર થઈ રહ્યો છે, તેથી જોવું એ રહ્યું કે પટેલના જવાથી તેની પુનઃપ્રાપ્તિ પર કોઈ અસર પડશે કે નહીં. એવો દાવો કરવામાં આવી રહ્યો છે કે બુમરાહ આગામી ઇન્ડિયન પ્રીમિયર લીગ (IPL) 2025ની પ્રથમ કેટલીક મેચોમાંથી બહાર રહી શકે છે