નવી દિલ્હી: ભારતીય ODI ક્રિકેટ ટીમના કેપ્ટન રોહિત શર્માએ એક મહત્વપૂર્ણ સંદેશ શેર કર્યો અને દેશવાસીઓને એકતા અને જવાબદારી માટે અપીલ કરી. આ સંદેશ એવા સમયે આવ્યો છે જ્યારે ભારતે 7 મેના રોજ પાકિસ્તાન અને પાકિસ્તાન અધિકૃત કાશ્મીરમાં નવ આતંકવાદી છાવણીઓ સામે ‘ઓપરેશન સિંદૂર’ સફળતાપૂર્વક શરૂ કર્યું હતું. આ પછી, પાકિસ્તાને પણ ડ્રોન અને મિસાઇલોથી ભારત પર હુમલો કર્યો, જેને ભારતીય સેનાએ નિષ્ફળ બનાવ્યો.આ કાર્યવાહી 26 ભારતીય નાગરિકોની હત્યાના જવાબમાં કરવામાં આવી હતી. બંને દેશો વચ્ચે તણાવ વધવાની સાથે, અફવાઓનો દોર પણ શરૂ થયો છે. રોહિત શર્માએ સોશિયલ મીડિયા પ્લેટફોર્મ X પર એક સંદેશ પોસ્ટ કર્યો અને પોતાના સંદેશમાં, તેમણે ભારતીય સેના, વાયુસેના અને નૌકાદળના જવાનોની બહાદુરીની પ્રશંસા કરી, જેઓ દેશની સુરક્ષા માટે અડગ ઊભા છે.તેમણે લખ્યું, “દરેક ક્ષણે, દરેક નિર્ણય સાથે, મને આપણી સેના, વાયુસેના અને નૌકાદળ પર ગર્વ છે. આપણા યોદ્ધાઓ પોતાના દેશના ગૌરવ માટે મજબૂત રીતે ઉભા છે. દેશના દરેક નાગરિકે જવાબદાર રહેવું પડશે અને ખોટા સમાચારોથી દૂર રહેવું પડશે. સુરક્ષિત રહો!” આ પછી, રોહિતે પોસ્ટમાં જય હિંદ અને ઓપરેશન સિંદૂર હેશટેગ્સ પણ ઉમેર્યા.