મુંબઈ :આંતરરાષ્ટ્રીય ક્રિકેટ પરિષદ (ICC) એ આ વર્ષના મહિલા ક્રિકેટ વર્લ્ડ કપની તારીખો અને સ્થળોની પુષ્ટિ કરી છે. આ ટુર્નામેન્ટની 13મી આવૃત્તિ હશે, જે 30 સપ્ટેમ્બરથી 2 નવેમ્બર દરમિયાન યોજાશે. ભારત અને શ્રીલંકાના 5 સ્થળોએ યોજાનારી આ ટુર્નામેન્ટમાં કુલ 8 ટીમો ભાગ લેશે. 

ક્યાં સ્થળોએ વર્લ્ડ કપ મેચો રમાશે.: એમ. ચિન્નાસ્વામી સ્ટેડિયમ (બેંગલુરુ),ACA સ્ટેડિયમ (ગુવાહાટી),હોલકર સ્ટેડિયમ (ઈન્દોર),ACA-VDCA સ્ટેડિયમ (વિશાખાપટ્ટનમ),આર. પ્રેમદાસા સ્ટેડિયમ (કોલંબો)

વર્લ્ડ કપ 30 સપ્ટેમ્બરે બેંગલુરુમાં ભારતની મેચ સાથે શરૂ થશે, જે 12 વર્ષ પછી ભારતમાં મહિલા ક્રિકેટ વર્લ્ડ કપની વાપસી દર્શાવે છે. આ ટુર્નામેન્ટની પહેલી સેમિફાઇનલ 29 ઓક્ટોબરે ગુવાહાટી અથવા કોલંબોમાં રમાશે, જ્યારે બીજી સેમિફાઇનલ 30 ઓક્ટોબરે બેંગલુરુમાં રમાશે. ફાઇનલ મેચ રવિવાર, 2 નવેમ્બરના રોજ બેંગલુરુ અથવા કોલંબોમાં રમાશે. બંને ફાઇનલિસ્ટ ટીમોને ટાઇટલ મેચ માટે ઓછામાં ઓછા બે દિવસનો સમય મળશે.

ભારત, ઓસ્ટ્રેલિયા, ઈંગ્લેન્ડ, દક્ષિણ આફ્રિકા, ન્યુઝીલેન્ડ, શ્રીલંકા, બાંગ્લાદેશ અને પાકિસ્તાન. ઓસ્ટ્રેલિયા આ ટુર્નામેન્ટમાં ડિફેન્ડિંગ ચેમ્પિયન તરીકે પ્રવેશ કરશે. તેઓએ 2022 માં ન્યુઝીલેન્ડમાં ઇંગ્લેન્ડને હરાવીને છેલ્લો મહિલા વર્લ્ડ કપ જીત્યો હતો. ઓસ્ટ્રેલિયા આ ટુર્નામેન્ટના ઇતિહાસમાં સૌથી સફળ ટીમ પણ છે, જેણે સાત વખત ટાઇટલ જીત્યું છે.

ભારત, પાકિસ્તાન અને ICC કોઈપણ વૈશ્વિક ટુર્નામેન્ટ માટે હાઇબ્રિડ હોસ્ટિંગ મોડેલ પર સંમત થયા હતા. ભારતે ચેમ્પિયન્સ ટ્રોફી રમવા માટે પાકિસ્તાન જવાનો ઇનકાર કરી દીધો હતો, ત્યારબાદ લાંબી વાટાઘાટો બાદ આ કરાર થયો હતો. આ કરાર હેઠળ જ ચેમ્પિયન્સ ટ્રોફી 2025 માં ભારતના મેચો દુબઈ ખસેડવામાં આવ્યા હતા. ભારત, દક્ષિણ આફ્રિકા, શ્રીલંકા, ઇંગ્લેન્ડ, ન્યુઝીલેન્ડ, ઓસ્ટ્રેલિયા, બાંગ્લાદેશ અને પાકિસ્તાને 2025 ના મહિલા વર્લ્ડ કપ માટે ક્વોલિફાય કર્યું છે.