બેંગલુરુના ચિન્નાસ્વામી સ્ટેડિયમમાં થયેલી ભાગદોડમાં ૧૧ લોકોના મોત બાદ હવે બીસીસીઆઈ (ભારતીય ક્રિકેટ નિયંત્રણ બોર્ડ) એક્શન મોડમાં આવી ગયું છે. હવે ભારતીય બોર્ડ આઈપીએલ વિજય પછી ઉજવણી માટે નિયમો બનાવવાની તૈયારી કરી રહ્યું છે. શનિવારે યોજાનારી બીસીસીઆઈની ૨૮મી એપેક્સ કાઉન્સિલની બેઠકમાં આ મુદ્દો એક મહત્વપૂર્ણ એજન્ડા હશે.

     ગયા બુધવારે, સ્ટેડિયમ અને તેની આસપાસ લગભગ ૨.૫ લાખ લોકો તેમના મનપસંદ ખેલાડીઓની એક ઝલક જોવા માટે એકઠા થયા હતા. આ દરમિયાન, ભાગદોડ મચી ગઈ હતી, જેમાં ૧૧ લોકો માર્યા ગયા હતા અને ઘણા ઘાયલ થયા હતા.

    બીસીસીઆઈએ સ્વીકાર્યું છે કે ઉજવણી વધુ સારી રીતે ગોઠવી શકાઈ હોત. હવે બેઠકમાં આ સમગ્ર મામલે ઔપચારિક ચર્ચા થશે. એક સૂત્રએ પીટીઆઈને જણાવ્યું હતું કે - બેઠકમાં આઈપીએલ પછી વિજય પરેડ અંગે નિયમો બનાવવાની જરૂરિયાત પર ચર્ચા કરવામાં આવશે.

   બીસીસીઆઈની ૨૮મી એપેક્સ કાઉન્સિલની બેઠકમાં ઘણા મહત્વપૂર્ણ મુદ્દાઓ પર ચર્ચા થવા જઈ રહી છે. ભારત અને ન્યુઝીલેન્ડ વચ્ચેની આગામી શ્રેણીની મેચો ક્યાં યોજાશે તે અંગે પણ નિર્ણય લેવામાં આવશે. આ સાથે, અંડર-૧૬ છોકરાઓ અને અંડર-૧૫ છોકરીઓના વય જૂથ ક્રિકેટમાં વય-ગેરફેરની સમસ્યાને રોકવા માટે ચાલુ વય ચકાસણી કાર્યક્રમની સમીક્ષા કરવામાં આવશે.

   બીજો મહત્વપૂર્ણ મુદ્દો તેલંગાણામાં ક્રિકેટ ઇન્ફ્રાસ્ટ્રક્ચર ફંડના દુરુપયોગ સાથે સંબંધિત છે. એપ્રિલ ૨૦૨૫માં, કરીમનગર જિલ્લા ક્રિકેટ એસોસિએશનના પ્રમુખ વી. અગમ રાવે ફરિયાદ કરી હતી કે જિલ્લામાં ક્રિકેટ માટે મળેલા ભંડોળનો દુરુપયોગ થયો છે. આ અંગે કાર્યવાહી કરતા, બીસીસીઆઈ લોકપાલ ન્યાયાધીશ અરુણ મિશ્રાએ એપેક્સ કાઉન્સિલને આ બાબતે જરૂરી પગલાં લેવા કહ્યું હતું. હવે આ મુદ્દો પણ બેઠકમાં ઉઠાવવામાં આવશે

  આ ઉપરાંત, આ મુદ્દાઓ પર પણ બેઠકમાં ચર્ચા કરવામાં આવશે - ખેલાડીઓ અને ટીમ અધિકારીઓ માટે આચારસંહિતા - બીસીસીઆઈ કર્મચારીઓ માટે ટુર્નામેન્ટ ભથ્થા નીતિ - ૨૦૨૫-૨૬ સ્થાનિક સિઝનની તૈયારીઓ અંગે અપડેટ - અમ્પાયરો અને મેચ રેફરી કોચિંગ સંબંધિત બાબતો