નવી દિલ્હી: ઓસ્ટ્રેલિયન સ્પિનર ​​નાથન લિયોનનો હજુ નિવૃત્તિ લેવાનો કોઈ ઇરાદો નથી. ૩૭ વર્ષીય અનુભવી ખેલાડી પોતાની કારકિર્દીના અંત પહેલા ઇંગ્લેન્ડ અને ભારતમાં સિરીઝ  જીતવા તેમજ વધુ એક વર્લ્ડ ટેસ્ટ ચેમ્પિયનશિપનો ખિતાબ જીતવા માંગે છે. ૨૦૨૩માં ઓસ્ટ્રેલિયાએ ભારત સામે વર્લ્ડ ટેસ્ટ ચેમ્પિયનશિપની ફાઇનલ જીતી હતી. લિયોને આમાં મહત્વની ભૂમિકા ભજવી હતી. આ પછી, નાથન લિયોન ગયા મહિને લોર્ડ્સમાં દક્ષિણ આફ્રિકા સામેની WTC ફાઇનલનો ભાગ હતો, જેમાં ઓસ્ટ્રેલિયાને હારનો સામનો કરવો પડ્યો હતો.નાથન લિયોને ૨૦૧૧માં આંતરરાષ્ટ્રીય ક્રિકેટમાં પ્રવેશ કર્યો હતો. લિયોને તાજેતરમાં વેસ્ટ ઇન્ડીઝ સામે ઓસ્ટ્રેલિયાની શાનદાર જીતમાં ત્રણ વિકેટ ઝડપી હતી.'Cricket.com.au' એ નાથન લિયોનને ટાંકીને કહ્યું, "મેં હંમેશા કહ્યું છે કે હું ભારતમાં જીતવા માંગુ છું. હું ઇંગ્લેન્ડમાં જીતવા માંગુ છું. અમને થોડા વર્ષોમાં તે તક મળશે, પરંતુ અમારે ટેસ્ટ-બાય-ટેસ્ટ રમવી પડશે. ખાતરી કરવી પડશે કે અમે વેસ્ટ ઇન્ડીઝમાં બધું બરાબર કરી રહ્યા છીએ. પછી અમારી આગળ એશિઝ સિરીઝ પણ છે. પરંતુ બીજી વર્લ્ડ ટેસ્ટ ચેમ્પિયનશિપ ફાઇનલ ચોક્કસપણે મારું લક્ષ્ય હશે." નાથન લિયોન હાલમાં ટેસ્ટ ક્રિકેટમાં 556 વિકેટ ધરાવે છે. તે સૌથી વધુ ટેસ્ટ વિકેટ મેળવનારા ઓસ્ટ્રેલિયન બોલરોની યાદીમાં ત્રીજા ક્રમે છે. તેમના ઉપર શેન વોર્ન (708) અને ભૂતપૂર્વ ફાસ્ટ બોલર ગ્લેન મેકગ્રા (563) છે. ઓસ્ટ્રેલિયાને જુલાઈમાં વેસ્ટ ઇન્ડીઝ સામે બે ટેસ્ટ રમવાની છે. ઓસ્ટ્રેલિયાએ આ વર્ષના અંતમાં ઇંગ્લેન્ડ સામે પણ મેચ રમવાની છે. આવી સ્થિતિમાં, એવી શક્યતા છે કે નાથન લિયોન ટૂંક સમયમાં ગ્લેન મેકગ્રાને પાછળ છોડી દેશે. જોકે, શેન વોર્નના ટેસ્ટ વિકેટ રેકોર્ડની નજીક પહોંચવું એક મોટો પડકાર છે. તેમણે આગળ કહ્યું, "વોર્ન હજુ પણ ખૂબ દૂર છે. મારી નજરમાં, તે ક્રિકેટ રમનાર સૌથી મહાન ખેલાડી છે. હું ભાગ્યશાળી છું કે હું હાલમાં એક ખૂબ જ ખાસ ક્રિકેટ ટીમનો ભાગ છું. આપણે એક મહાન ક્રિકેટ ટીમ બનવાના માર્ગ પર છીએ. આ બોલિંગ આક્રમણનો ભાગ બનવું અને મારી ભૂમિકા ભજવવી એ ખાસ વાત છે. આ જ કારણ છે કે હું રમી રહ્યો છું."