સિન્સીનાટી : બ્રિટિશ ટેનિસ સ્ટાર એમ્મા રાડુકાનુ સોમવારે સિન્સીનાટી ઓપન ટેનિસ ટુર્નામેન્ટમાં વિશ્વની નંબર વન ખેલાડી આર્યના સબાલેન્કા સામેની હાર દરમિયાન એક અનોખા વિવાદમાં ફસાઈ ગઈ. મેચના ત્રીજા સેટમાં જ્યારે તે સર્વિસ કરી રહી હતી, ત્યારે સ્ટેન્ડમાંથી એક બાળકના રડવાનો અવાજ આવતા તેણે અમ્પાયરને ફરિયાદ કરી, જેના પર બંને વચ્ચે તણાવપૂર્ણ દલીલ થઈ.
 
શું બન્યું મેચ દરમિયાન?
•     ત્રણ કલાકથી વધુ સમય ચાલેલી આ મેચના ત્રીજા સેટમાં રાડુકાનુ 3-4 થી પાછળ હતી અને 13 વખત ડ્યૂસ સુધી પહોંચ્યા બાદ પણ તે રમતને સમાપ્ત કરી શકતી નહોતી.
•     આ દરમિયાન, જ્યારે એક બાળકનો રડવાનો અવાજ આવ્યો, ત્યારે રાડુકાનુએ સર્વિસ આપતા અટકી ગઈ અને અમ્પાયરને ફરિયાદ કરી.
•    રાડુકાનુએ અમ્પાયરને કહ્યું, "10 મિનિટ થઈ ગઈ છે." તેના જવાબમાં અમ્પાયરે કહ્યું, "આ એક બાળક છે. શું તમે ઈચ્છો છો કે હું બાળકને સ્ટેડિયમમાંથી બહાર કાઢી નાખું?"
 
ચાહકોની પ્રતિક્રિયા અને વિવાદ
અમ્પાયરની આ ટિપ્પણીથી સોશિયલ મીડિયા પર ચાહકો ભડકી ઉઠ્યા. અનેક યુઝર્સે અમ્પાયરના વર્તનને 'બિનવ્યાવસાયિક' અને 'નાટકીય' ગણાવ્યું. કેટલાક ચાહકોએ સવાલ ઉઠાવ્યો કે, જો બાળક રડી રહ્યું હોય તો માતા-પિતાએ તેને બહાર કેમ ન લઈ જવું જોઈએ.

જોકે, આ વિવાદ બાદ પણ રાડુકાનુએ તે ગેમ જીતીને સ્કોર 4-4 થી બરાબર કર્યો, પરંતુ મેચના અંતે તે 7-6 (7-3), 4-6, 7-6 (7-5) ના સ્કોરથી સબાલેન્કા સામે હારી ગઈ. મેચ બાદ રાડુકાનુએ આ ઘટના વિશે કોઈ ટિપ્પણી કરી ન હતી, પરંતુ કહ્યું કે તેણે સબાલેન્કાને વિમ્બલ્ડન કરતાં વધુ સારો પડકાર આપ્યો, જે તેના માટે એક સુધારો છે.