13 ઓગસ્ટ, 2025: આંતરરાષ્ટ્રીય ક્રિકેટ કાઉન્સિલ (ICC) દ્વારા જાહેર કરવામાં આવેલી નવીનતમ રેન્કિંગમાં ભારતીય ક્રિકેટરોએ દબદબો જાળવી રાખ્યો છે. ખાસ વાત એ છે કે કેપ્ટન રોહિત શર્મા અને યુવા બેટ્સમેન તિલક વર્માને કોઈ પણ મેચ રમ્યા વિના રેન્કિંગમાં ફાયદો થયો છે. આ બંને ખેલાડીઓ પાકિસ્તાનના બાબર આઝમ અને ઓસ્ટ્રેલિયાના ટ્રેવિસ હેડના નબળા પ્રદર્શનને કારણે આગળ વધ્યા છે.
 
ICCની નવીનતમ ODI બેટ્સમેન રેન્કિંગમાં, ભારતના કેપ્ટન રોહિત શર્મા એક સ્થાન ઉપર ચઢીને બીજા સ્થાને પહોંચી ગયા છે. તેમના 756 રેટિંગ પોઈન્ટ્સ છે. આ ફાયદો તેમને પાકિસ્તાનના બાબર આઝમના ખરાબ પ્રદર્શનને કારણે મળ્યો. બાબર આઝમ વેસ્ટ ઈન્ડિઝ સામેની છેલ્લી બે વનડે મેચમાં અનુક્રમે 0 અને 9 રન જ બનાવી શક્યો, જેના કારણે તે ત્રીજા સ્થાને સરકી ગયો છે.

ભારતના અન્ય ખેલાડીઓની વાત કરીએ તો, શુભમન ગિલ (784) પહેલા સ્થાને યથાવત છે. વિરાટ કોહલી (736) ચોથા સ્થાને અને શ્રેયસ ઐયર (704) આઠમા સ્થાને છે. આ રીતે, ટોપ-10 ODI બેટ્સમેનોમાં ભારતના ચાર ખેલાડીઓનો સમાવેશ થાય છે.
 
T20 રેન્કિંગ્સમાં પણ ભારતીય ખેલાડીઓનો જલવો જોવા મળ્યો છે. યુવા સ્ટાર તિલક વર્મા એક સ્થાન આગળ વધીને બીજા સ્થાને પહોંચી ગયો છે. તેને આ લાભ ઓસ્ટ્રેલિયાના બેટ્સમેન ટ્રેવિસ હેડના ખરાબ પ્રદર્શનને કારણે મળ્યો. હેડ દક્ષિણ આફ્રિકા સામેની T20 શ્રેણીમાં માત્ર 2 અને 5 રન જ બનાવી શક્યો, જેના કારણે તે ચોથા સ્થાને સરકી ગયો. આ યાદીમાં અભિષેક શર્મા (829) પ્રથમ સ્થાને યથાવત છે.

આ ઉપરાંત, ઓસ્ટ્રેલિયાના ટિમ ડેવિડે છ સ્થાનનો ઉછાળો મેળવીને ટોપ-10 માં પ્રવેશ કર્યો છે, જ્યારે દક્ષિણ આફ્રિકાના ડેવાલ્ડ બ્રેવિસ અને ટ્રિસ્ટન સ્ટબ્સે પણ પોતાની રેન્કિંગમાં સુધારો કર્યો છે.

ટેસ્ટ રેન્કિંગ્સની વાત કરીએ તો, ન્યૂઝીલેન્ડના ફાસ્ટ બોલર મેટ હેનરીએ પોતાની કારકિર્દીનું સર્વોચ્ચ રેટિંગ મેળવીને ત્રીજું સ્થાન હાંસલ કર્યું છે. ઝિમ્બાબ્વે સામેની ટેસ્ટ શ્રેણીમાં 9.12 ની સરેરાશથી 16 વિકેટ ઝડપીને તે પ્લેયર ઓફ ધ સિરીઝ બન્યો હતો. ભારતના સ્ટાર બોલર જસપ્રીત બુમરાહ (889) પહેલા સ્થાને યથાવત છે, જ્યારે દક્ષિણ આફ્રિકાના કાગીસો રબાડા બીજા અને ઓસ્ટ્રેલિયાના પેટ કમિન્સ ચોથા સ્થાને છે.