નવી દિલ્હી : દક્ષિણ આફ્રિકા અને ઓસ્ટ્રેલિયા વચ્ચેની ODI શ્રેણીનો પ્રારંભ ખૂબ જ રોમાંચક રહ્યો. કેર્ન્સના કાઝાલી સ્ટેડિયમ ખાતે રમાયેલી પહેલી મેચમાં, દક્ષિણ આફ્રિકાએ ઓસ્ટ્રેલિયાને ૯૮ રનથી હરાવીને શ્રેણીમાં ૧-૦ની સરસાઈ મેળવી લીધી છે. આ જીતનો હીરો રહ્યો ભારતીય મૂળનો સ્પિનર કેશવ મહારાજ, જેણે પોતાની ઘાતક બોલિંગથી ઓસ્ટ્રેલિયાના મિડલ ઓર્ડરને ધ્વસ્ત કરી નાખ્યો.
 
મેચમાં, દક્ષિણ આફ્રિકાએ પહેલા બેટિંગ કરીને ૨૯૬ રનનો મજબૂત સ્કોર બનાવ્યો. આ પડકારનો પીછો કરવા ઉતરેલી ઓસ્ટ્રેલિયન ટીમ માટે કેપ્ટન મિશેલ માર્શ એકલા હાથે લડી રહ્યા હતા. તેઓએ ૯૬ બોલમાં ૮૮ રન બનાવીને ટીમને સ્થિરતા આપી. જોકે, કેશવ મહારાજની બોલિંગ આવતા જ મેચનું પાસું પલટાઈ ગયું.

કેશવ મહારાજે માત્ર ૩૩ રન આપીને ૫ વિકેટ ઝડપી, જેમાં માર્નસ લાબુશેન, કેમેરોન ગ્રીન, જોશ ઇંગ્લિસ, એલેક્સ કેરી અને એરોન હાર્ડી જેવા મહત્વના બેટ્સમેનોનો સમાવેશ થાય છે. તેમના આ પ્રદર્શનને કારણે ઓસ્ટ્રેલિયાનો સ્કોર ૧ વિકેટે ૬૦ રનથી સીધો ૬ વિકેટે ૮૯ રન થઈ ગયો. આ ધબડકો ઓસ્ટ્રેલિયા માટે જીતની શક્યતાને નકારી કાઢ્યો. અંતે, આખી ટીમ ૧૯૮ રનમાં ઓલઆઉટ થઈ ગઈ.
 
કેશવ મહારાજે બોલિંગ ઉપરાંત બેટિંગમાં પણ ૧૩ રનનું ઉપયોગી યોગદાન આપ્યું હતું. દક્ષિણ આફ્રિકાની બેટિંગમાં પણ માર્કરામ (૮૨), ટેમ્બા બાવુમા (૬૫) અને મેથ્યુ બ્રિત્ઝકે (૫૭) જેવા બેટ્સમેનોએ શાનદાર અર્ધશતક ફટકારીને ટીમને મજબૂત સ્થિતિમાં પહોંચાડી હતી.

મહારાજને તેના ઓલરાઉન્ડ પ્રદર્શન માટે પ્લેયર ઓફ ધ મેચ જાહેર કરવામાં આવ્યો હતો. આ જીત દક્ષિણ આફ્રિકા માટે T20I શ્રેણીમાં ૨-૧થી મળેલી હાર બાદ એક મોટી રાહત સમાન છે. હવે ઓસ્ટ્રેલિયાએ શ્રેણીમાં પાછા ફરવા માટે બીજી ODIમાં સ્પિન સામે પોતાની રણનીતિમાં સુધારો કરવો પડશે.