<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Thursday, 21st August 2025

હોકી એશિયા કપ માટે ટીમ ઈન્ડિયાની જાહેરાત: હરમનપ્રીત સિંહ ટીમનું નેતૃત્વ કરશે

ભારત 29 ઓગસ્ટે ચીન સામે હોકી એશિયા કપમાં પોતાના અભિયાનની શરૂઆત કરશે

હોકી ઇન્ડિયાએ 20 ઓગસ્ટના રોજ આગામી મેન્સ એશિયા કપ માટે 18 સભ્યોની ભારતીય પુરુષ હોકી ટીમની જાહેરાત કરી હતી. આ ટુર્નામેન્ટ 29 ઓગસ્ટથી 7 સપ્ટેમ્બર, 2025 દરમિયાન બિહારના રાજગીર હોકી સ્ટેડિયમ ખાતે રમાશે. આ ટુર્નામેન્ટમાં ભારતને જાપાન, ચીન અને કઝાકિસ્તાન સાથે ગ્રુપ Aમાં સ્થાન આપવામાં આવ્યું છે. ભારત 29 ઓગસ્ટે ચીન સામે હોકી એશિયા કપમાં પોતાના અભિયાનની શરૂઆત કરશે, ત્યારબાદ 31 ઓગસ્ટે જાપાન અને 1 સપ્ટેમ્બરે કઝાકિસ્તાન સામે રમશે.

અનુભવી ડ્રેગ-ફ્લિકર હરમનપ્રીત સિંહ આગામી ટુર્નામેન્ટમાં ટીમ ઈન્ડિયાનું નેતૃત્વ કરશે. એકંદરે, હોકી એશિયા કપ માટેની ટીમમાં અનુભવી ખેલાડીઓ છે. આ બધા ખેલાડીઓ આગામી ટુર્નામેન્ટમાં સારું પ્રદર્શન કરવા માંગશે.

ટુર્નામેન્ટ માટે ગોલકીપિંગની જવાબદારી વિશ્વસનીય કૃષ્ણ બી પાઠક અને સૂરજ કરકેરા સંભાળશે. ડિફેન્સમાં કેપ્ટન હરમનપ્રીત સિંહ અને અમિત રોહિદાસ સાથે જર્મનપ્રીત સિંહ, સુમિત, સંજય અને જુગરાજ સિંહ ડિફેન્સ યુનિટને મજબૂત બનાવવા માટે જોડાશે.

મિડફિલ્ડમાં મનપ્રીત સિંહ, વિવેક સાગર પ્રસાદ, રાજિન્દર સિંહ, રાજકુમાર પાલ અને હાર્દિક સિંહ જેવા મજબૂત ખેલાડીઓનો સમાવેશ થાય છે. ફોરવર્ડ આક્રમણનું નેતૃત્વ મનદીપ સિંહ, અભિષેક, સુખજીત સિંહ, શિલાનંદ લાકરા અને દિલપ્રીત સિંહ કરશે, જેઓ કોઈપણ વિરોધી ડિફેન્સને મુશ્કેલીમાં મુકવાની ક્ષમતા ધરાવે છે.
ટીમની જાહેરાત બાદ ભારતીય હોકી પુરુષ ટીમના કોચ ક્રેગ ફુલ્ટને કહ્યું કે, અમે એક અનુભવી ટીમ પસંદ કરી છે જે દબાણમાં કેવી રીતે પ્રદર્શન કરવું તે જાણે છે. એશિયા કપ અમારા માટે ખૂબ જ મહત્વપૂર્ણ છે કારણ કે વર્લ્ડ કપ માટે અમારી ક્વોલિફિકેશન દાવ પર છે, તેથી અમને એવા ખેલાડીઓની જરૂર હતી જેમની પાસે ધીરજ અને સારું પ્રદર્શન કરવાની ક્ષમતા હોય.

તેમણે વધુમાં કહ્યું કે, હું ટીમના સંતુલન અને ગુણવત્તાથી ખૂબ જ ખુશ છું. અમારી પાસે દરેક વિભાગ (ડિફેન્સ, મિડફિલ્ડ અને આક્રમણ)માં અનુભવી ખેલાડીઓ છે અને આ સામૂહિક શક્તિ મને સૌથી વધુ ઉત્સાહિત કરે છે. મને લાગે છે કે આ ટીમ જે રીતે સાથે રમે છે તે અમારી સૌથી મોટી તાકાત હશે.

હોકી એશિયા કપ માટે ભારતીય ટીમ
ગોલકીપર્સ - ક્રિશન બી પાઠક, સૂરજ કરકેરા
ડિફેન્ડર્સ - સુમિત, જર્મનપ્રીત સિંહ, સંજય, હરમનપ્રીત સિંહ, અમિત રોહિદાસ, જુગરાજ સિંહ
મિડફિલ્ડર - રાજિન્દર સિંહ, રાજ કુમાર પાલ, હાર્દિક સિંહ, મનપ્રીત સિંહ, વિવેક સાગર પ્રસાદ.
ફોરવર્ડ - મનદીપ સિંહ, શિલાનંદ લાકરા, અભિષેક, સુખજીત સિંહ, દિલપ્રીત સિંહ

(12:37 AM IST)