શિમકેન્ટ, કઝાકિસ્તાન : કઝાકિસ્તાનના શિમકેન્ટમાં ચાલી રહેલી એશિયન શૂટિંગ ચેમ્પિયનશિપના અંતિમ દિવસે ભારતીય શૂટર્સે શાનદાર પ્રદર્શન કરીને દેશનું ગૌરવ વધાર્યંન છે. અનુભવી પિસ્તોલ શૂટર ગુરપ્રીત સિંહના નેતૃત્વમાં ભારતીય ટીમે ૨૫ મીટર સેન્ટર ફાયર પિસ્તોલ ઇવેન્ટમાં ગોલ્ડ મેડલ જીત્યો, જ્યારે યુવા શૂટર માનિની કૌશિકે મહિલા ૫૦ મીટર રાઇફલ પ્રોન ઇવેન્ટમાં બ્રોન્ઝ મેડલ પોતાના નામે કર્યો.
 
ગુરપ્રીત સિંહની ડબલ ગોલ્ડ જીત
૩૭ વર્ષીય આર્મી શૂટર ગુરપ્રીત સિંહ માટે આ ચેમ્પિયનશિપ અત્યંત સફળ રહી છે. ૨૫ મીટર સ્ટાન્ડર્ડ પિસ્તોલ વ્યક્તિગત ગોલ્ડ જીત્યાના એક દિવસ પછી, તેમણે રાજકંવર સિંહ સંધુ અને અંકુર ગોયલ સાથે મળીને ૨૫ મીટર સેન્ટર ફાયર ઇવેન્ટમાં ટીમ ગોલ્ડ જીત્યો. આ ત્રિપુટીએ કુલ ૧૭૩૩ પોઈન્ટ મેળવીને વિયેતનામ (૧૭૨૦) અને ઈરાન (૧૭૦૦) ને પાછળ રાખીને ટોચનું સ્થાન હાંસલ કર્યું.
 
માનિની કૌશિકનો પ્રથમ આંતરરાષ્ટ્રીય બ્રોન્ઝ
૨૪ વર્ષીય માનિની કૌશિકે પોતાના કરિયરનો પ્રથમ વ્યક્તિગત આંતરરાષ્ટ્રીય મેડલ જીત્યો, જે ઓલિમ્પિક સિવાયની ઇવેન્ટ હતી. મહિલા ૫૦ મીટર રાઇફલ પ્રોનમાં તેમણે ૬૧૭.૮નો સ્કોર કરીને બ્રોન્ઝ મેડલ જીત્યો. તેમણે ટીમના સિલ્વર મેડલ જીતવામાં પણ મહત્વની ભૂમિકા ભજવી, જેમાં સુરભિ ભારદ્વાજ અને વિનોદ વિદર્શનો સમાવેશ થતો હતો. આ ત્રિપુટીએ કુલ ૧૮૪૬ પોઈન્ટ મેળવીને દક્ષિણ કોરિયા (૧૮૫૬.૮) પછી બીજું સ્થાન મેળવ્યું.

આ સિવાય, જુનિયર મહિલા ૫૦ મીટર રાઇફલ પ્રોન ઇવેન્ટમાં પ્રાચી ગાયકવાડે સિલ્વર મેડલ જીત્યો અને ટીમને બ્રોન્ઝ મેડલ અપાવવામાં મદદ કરી. આ શાનદાર પ્રદર્શન સાથે ભારતે નોન-ઓલિમ્પિક શાખાઓમાં પણ પોતાનું વર્ચસ્વ સાબિત કર્યું.