ન્યૂ યોર્ક : યુએસ ઓપન ૨૦૨૫ હવે તેની ચરમસીમાએ પહોંચી ગયો છે, અને શુક્રવારે રાત્રે ટેનિસ જગતના ત્રણ મોટા સ્ટાર્સ - કાર્લોસ અલ્કારાઝ, નોવાક જોકોવિચ અને આર્યના સબાલેન્કા -એ પોતપોતાના રાઉન્ડમાં વિજય મેળવીને ચોથા રાઉન્ડમાં ધમાકેદાર પ્રવેશ કર્યો છે. જોકે, આ જીત આસાન ન હતી. ત્રણેય દિગ્ગજોએ મેચ દરમિયાન કોઈને કોઈ પડકારનો સામનો કર્યો.
 
ઈજા છતાં અલ્કારાઝનો દમદાર વિજય
૨૦૨૨ના યુએસ ઓપન ચેમ્પિયન કાર્લોસ અલ્કારાઝએ ઇટાલીના લુસિયાનો ડાર્ડેરી સામે ૬-૨, ૬-૪, ૬-૦થી શાનદાર જીત મેળવી. જોકે, મેચના બીજા સેટમાં એક ક્ષણ માટે બધાના શ્વાસ અધ્ધર થઈ ગયા હતા. જ્યારે અલ્કારાઝ ૬-૨, ૫-૪થી આગળ હતો, ત્યારે તેને જમણી જાંઘમાં દુખાવો થતા મેડિકલ ટાઈમ આઉટ લેવો પડ્યો.

અલ્કારાઝે પોતે જણાવ્યું કે તેને થોડી અસ્વસ્થતા હતી, પરંતુ ફિઝિયોની સારવાર બાદ તે સંપૂર્ણપણે સ્વસ્થ થઈ ગયો. આ સારવાર પછી તે વધુ આક્રમક બન્યો અને બીજો સેટ ૬-૪થી જીતી લીધો. ત્રીજા સેટમાં તો તેણે ડાર્ડેરીને એક પણ ગેમ જીતવા દીધી નહિ અને ૬-૦થી સેટ જીતીને મેચ પોતાના નામે કરી લીધી. અત્યાર સુધી, આ યુએસ ઓપનમાં ૨૨ વર્ષીય અલ્કારાઝે એક પણ સેટ ગુમાવ્યો નથી. ચોથા રાઉન્ડમાં તેનો મુકાબલો ફ્રાન્સના આર્થર રિન્ડરકનેચ સામે થશે.
 
રાયબાકીનાએ ઇતિહાસ રચ્યો
મહિલા સિંગલ્સમાં, ૨૦૨૨ની વિમ્બલ્ડન ચેમ્પિયન એલેના રાયબાકીનાએ એમ્મા રાદુકાનુને ૬-૧, ૬-૨થી હરાવીને પોતાના કરિયરમાં પહેલીવાર યુએસ ઓપનના ચોથા રાઉન્ડમાં પ્રવેશ કર્યો છે. આ જીત સાથે, તેણે તમામ ચાર ગ્રાન્ડ સ્લેમ ટુર્નામેન્ટમાં બીજા અઠવાડિયામાં પ્રવેશ કરવાનો રેકોર્ડ બનાવ્યો છે.
 
જોકોવિચનો કમબેક
સર્બિયાના દિગ્ગજ ટેનિસ ખેલાડી નોવાક જોકોવિચએ પણ ત્રીજા રાઉન્ડમાં બ્રિટનના કેમેરોન નોરીને ૬-૪, ૬-૭(૪), ૬-૨, ૬-૩થી હરાવીને આગળ વધ્યો. મેચ દરમિયાન, જોકોવિચ કમરના દુખાવાથી પરેશાન હતો અને તેને સારવાર પણ લેવી પડી હતી. જોકે, તેની અનુભવી રમત સામે નોરી ટકી શક્યો નહિ. જોકોવિચે મેચ દરમિયાન પ્રેક્ષકોને શાંત રહેવા પણ કહ્યું હતું. ચોથા રાઉન્ડમાં તેનો સામનો જર્મનીના જાન-લેનાર્ડ સ્ટ્રફ સામે થશે.
 
સબાલેન્કાએ લીધો બદલો
વિશ્વની નંબર-૧ મહિલા ખેલાડી આર્યના સબાલેન્કાએ કેનેડાની લૈલા ફર્નાન્ડીઝને ૬-૩, ૭-૬(૨)થી હરાવીને ૨૦૨૧ના યુએસ ઓપનની સેમિફાઇનલની હારનો મીઠો બદલો લીધો. સબાલેન્કાએ શાનદાર રમત બતાવી, ખાસ કરીને બીજા સેટના ટાઈબ્રેકમાં, જ્યાં તેણે ૬-૧ની મજબૂત લીડ મેળવીને મેચ જીતી લીધી.